29-ամյա չինացին հանկարծակի կաթվածահար է եղել՝ 2 օր անընդմեջ սմարթֆոնով խաղալուց հետո
Չինաստանի Գուանչժոու քաղաքի 29-ամյա բնակչի ձեռքերն ու ոտքերը հանկարծակի կաթվածահար են եղել՝ երկու օր անընդմեջ իր բջջայինով խաղալուց հետո:
Ինչպես տեղեկացնում է Oddity Central-ը, տղամարդը միշտ էլ երկար ժամանակ է անցկացրել հեռախոսին նայելով, սակայն այս վերջին խաղային մարաթոնը չափազանց մեծ լարվածություն է ստեղծել նրա պարանոցի համար, ինչի արդյունքում վնասվել է ողնաշարը:
Անցյալ ամսվա վերջին չինացին երկու օր անդադար խաղացել է՝ ձգտելով հնարավորինս շատ առաջ գնալ բջջային տեսախաղում: Երրորդ օրվա սկզբում նա անհասկանալի ցավ է զգացել պարանոցի հատվածում, ինչից հետո րոպեների ընթացքում երկու ձեռքն ու ոտքն անշարժացել են:
Ծնողները նրան հասցրել հիվանդանոց, որտեղ հետազոտությունը ցույց է տվել, որ նրա մոտ պարանոցի սպոնդիլոզ (ողնաշարախտ) հեմատոմա է սկսվել: Դա նշանակում է, որ նրա կաթվածահար վիճակի պատճառը ողնաշարին սեղմող հատվածում արյան գնդիկների կուտակումն է:
Որոշ ժամանակ ինտենսիվ խնամքի տակ գտնվելով՝ երիտասարդը վերականգնել է շարժունակությունը, սակայն ամբողջական ապաքինման համար պետք է հավելյալ բուժում ստանա: