Төнге рейдлар – җитешсезлекләрне күбрәк ача
Узган атнада Зәй шәһәр-район эчке эшләр бүлегенә җинаятьләр турында 26 хәбәр кергән. Алар арасында наркотик сату, сексуаль характердагы көч куллану, кыйнау, чит кеше милкенә зыян салу, алименттан качып йөрү кебекләре бар. Җинаятьләргә юл куймау, аларны кисәтү максатында авыл җирлекләре территориясендәге административ биналар, машина-трактор парклары, терлекчелек комплекслары, клублар, уку йортларына төнге рейдлар үткәрелә. Шундый рейдлар барышында полиция хезмәткәрләре шактый гына кимчелекләр, милек, мал сакланышы буенча таләпләр үтәлмәүгә юлыга.
