ABD Senatı Rusiyege qarşı yañı sanktsiyalar azırlay

Tış işler komitetiniñ azaları senatorlar Lindsey Graham ve Robert Menendez yaqında Rusiyege qarşı ilâve sanktsiyalar kirsetilecegine dair qanun leyhası taqdim eteceklerini bildirdi.


 «Qanun leyhasını yaqın künlerde taqdim etecekmiz. Bu leyha CAATSA («Mecburiy sanktsiyalar vastasınen Amerika duşmanlarına qarşı küreş» - QA) çerçivesinde mecburiy sanktsiyalar kirsetmege yardım etecek. Ayrıca buKreml ile onıñ bizim demokratiyağa qarşı yürsetken kampaniyasınamaksimum basqı yapmaq içün ilâve sanktsiyalar kirsetmege yardım etecek. Aynı şekilde Vladimir Putin de amerikan memuriyetine qarşı areket başlatacağı aqqında bildirdi. Birleşken Devletler öz milletini qorçalaycağını añlaşılacaq tarzğa ketirmelimiz», – denilmekte senatorlarnıñ komitet saytında derc etken beyanatında.


Beyanatta teklif etilgen sıñırlav tedbirleri energetika saası, maliye, Rusiyedeki kiberşirketler ve Rusiyeniñ borcunen bağlı olacağı qayd etilmekte.


İyün ayında ABD maliye nazirligi «zararlı kiberfaaliyetke» alâqadar olğanında şübeli olğan Rusiyeniñ üç vatandaşı ve beş şirketine qarşı sanktsiyalar kirsetken edi. Aprel ayında ABD bir qaç Rusiye iş adamına qarşı sanktsiyalar kirsetti.