Айрат Хәйруллин Токарликов исемендәге ААҖдә булды
Әлмәт муниципаль районы башкарма комитеты җитәкчесе вазифаларын башкаручы Айрат Хәйруллин Токарликов исемендәге акционерлык җәмгыятендә булып, хуҗалык директоры Рәсим Исхаков һәм хуҗалыкның төп инвесторы булган «СМП-Нефтегаз» ААҖ вәкиле Фоат Комаров озатуында мөгезле эре терлек үстерү һәм симертү буенча комплекс эшчәнлеге белән танышты.
Аннары ул Кәләй авыл җирлегендәге тормыш-яшәеш белән кызыксынды. «Авыл клублары» программасын тормышка ашыру кысаларында Кәләйдә авыл клубы төзелеп килә. Айрат Хәйруллин төзелеш барган җирдә булды, эшләр барышы белән шәхсән танышты. 300 урынга исәпләнгән клубның бүген стеналарын өяләр. Объектка подряд оешмасы итеп «Основа С» ҖЧҖ беркетелгән.