Безнең яшьтәш: икебез дә - халыкка хезмәттә
25 яшь - күпме бу, әллә азмы? Газетабызның яшьтәше Руслан Вилданов аны яшьнәп яшәр чор, шул ук вакытта узган гомергә күпмедер бәя биреп, аңа карап киләчәккә план корыр, үзеңне төрле юнәлешләрдә сынап карар чак дип атады.
Русланга да 25, "Әлмәт таңнары"на да. Охшашлыкларыбыз күп икән безнең!
Бәйрәм санында яшьтиләребез арасыннан нәкъ менә Русланны сайлап алуыбыз очраклы түгел. Аңа карап "менә ичмасам чын егет" дип сокланасы, башкаларга үрнәк итеп куясы килә. Руслан Вилданов безнең сыман ук хәйриячелек, һөнәр алыштыру (ул спортчы да, пешекче дә, мөгаллимлек тә итә), иҗат белән шөгыльләнә. Без мәкаләләр белән утырсак, ул буш вакытын җырлар, шигырьләр, төрле кызыклы вакыйгалар язуга багышлый. Гитарада һәм пианинода уйный.
- Үземдә иҗади сәләт барлыгын тойгач, кешеләргә җырларым белән ярдәм итәргә булдым. Хаста кешеләрнең кәефен күтәрергә, тормышка ышаныч уятырга тырышам, - ди ул. - Әгәр һәркем үз шәхесен үстерү өстендә эшләп, таныш булмаган кешеләрне тикшереп, начар фикерләр такмаса, дөньябыз тагын да матур, шәфкатьлерәк булыр иде. Изге гамәлләр - һәркем өчен чын үрнәк.
Руслан Вилданов ятим һәм авыру балалар, социаль яктан якланмаган кешеләргә ярдәм итү максатыннан хәйрия чараларын еш оештыра һәм башка яшьләрне дә әлеге күркәм гамәлләргә җәлеп итәргә тырыша. Төньяк Осетиядәге хәрби чуалышларда катнашкан егет армия чорының тормышның, әти-әнисе кебек үк ипи белән суның да кадерен белергә өйрәтүен әйтте. Тормыш матур! - яшьтәшебез Руслан да, "Әлмәт таңнары" коллективы да әнә шундый фикердә.
Ирина Апачаева
Фотолар шәхси архивтан
