Թրամփը Գոհաբանության օրվա կապակցությամբ ներում է շնորհել Փիս անունով հնդկահավին (լուսանկարներ, տեսանյութ)
Միացյալ Նահանգների նախագահ Դոնալդ Թրամփը Գոհաբանության օրվան ընդառաջ մասնակցել է Սպիտակ տանն ավանդաբար անցկացվող միջոցառմանը, որի ժամանակ երկրի ղեկավարը ներում է շնորհում տոնական սեղանի համար Սպիտակ տուն բերված հնդկահավերին:
Ինչպես նշում է Daily Mail-ը, Թրամփը ներում է շնորհել Փիս անունով թռչնին:
«Ուրախ եմ հայտարարել, որ այսօրվա հաջողակ թռչունը Փիսն է, որի մրցակիցը Քերոթս անունով հնդկահավն էր: Ընտրությունը եղել է ազնիվ: Ցավոք, Քերոթսը չի ցանկացել ընդունել իր պարտությունն ու պահանջել է ձայների վերահաշվարկ: Ցավում եմ, Քերոթս, բայց քեզ համար վատ լուր ունեմ՝ քվեարկության արդյունքը չի փոխվել»,-կատակել է նախագահը:
Այնուհետև նա շնորհավորել է ամերիկացիներին Գոհաբանության տոնի առթիվ ու միասնության կոչ արել:
Նշվում է, որ միջոցառման ժամանակ Թրամփին ուղեկցել են կինը՝ Մելանյան, ավագ դուստրը՝ Իվանկան, փեսան ու թոռները:
Հնդկահավերին ներում շնորհելու ավանդույթը ձևավորվել է անցած դարի 40-ական թվականներին, սակայն այն պաշտոնական կարգավիճակ է ստացել միայն Ջորջ Բուշ ավագի կառավարման օրոք։