Ukrainada İtibar ve Azatlıq Künü qayd etile
«5 yıl evelsi qıymetlerini ve azatlığını qorçalamağa istegen ukrainalılar Kyivniñ Mustaqillik meydanına barışıq narazılıq ile çıqqan edi. Bundan soñ aylarnen narazılıqlar oldı, barışıqsever insanlarnı dağıta ve öldüre ediler. Ukrainalılar büyük zarar körip dayandı ve ğalip çıqtı! Elâk olğanlarnıñ hatırası aydın olsun!», – dep yazdı Ukraina baş naziri Volodımır Groysman Facebookta.
Bu kün 2005 senesinden 2011 senesine qadar Azatlıq künü olaraq qayd etile edi. Viktor Yanukoviç akimiyetke kelgeninen onıñ qayd etilmesi aman-aman lâğu etildi. Bayram ise yanvarniñ 22-nde qayd etilgen Birlik Künü ile birleştirildi.
2014 senesi prezident Petro Poroşenko onıñ resmiy statusını ğayrıdan tikledi, o yıldan berli Ukraina Portaqal inqilâbı ve Euromaydan yıllığını bir künde qayd ete.
Kyivde noyabrniñ 21-nde saat 10:00-da añma tedbirleri olacaq ve Sema Yüzü Qaramanlarınıñ alleyasına çeçekler qoyulacaq. Aynı vaqıtta şeerniñ merkezinde «Unutmadıq» aktsiyası çerçivesinde studentlerniñ yürüşi olacaq. Bayram şeer yolbaşçılığında da qayd etilecek. Kyiv şeeri devlet memuriyeti Maydan sanasında çıqışta bulunğan bazı artist ve taqımlarnıñ iştiraki ile kontsert programmasını teşkil etecek.