ცხინვალის დე ფაქტო სასამართლოს თანამშრომელი: „ნაკლებად უსმინეთ ბურჯანაძეს“
„ეხო კავკაზა“-ს ინფორმაციით, დე ფაქტო სასამართლოს ერთ-ერთმა მაღალი რანგის თანამშრომელმა შეკითხვაზე, გაათავისუფლებენ თუ არა ექიმს სასამართლო დარბაზიდან 13 დეკემბერს, ასე უპასუხა: „ნაკლებად უსმინეთ ბურჯანაძეს“.
როგორც „ეხო კავკაზა“-ს ცხინვალელი კორესპონდენტი იტყობინება, მიუხედავად იმისა, რომ სხდომა დახურული იყო, ოდნავ შეღებული კარიდან შესაძლებელი გახდა წვერიანი კაცის დანახვა, რომელიც იმყოფებოდა დაკავებულებისთვის განკუთვნილ საკანში. ადვილი არ იყო მედიაში გავრცელებული ფოტოს მიხედვით ექიმის ამოცნობა.
ნინო ბურჯანაძემ 9 დეკემბერს „პალიტრანიუსის“ ეთერში თქვა, რომ ვაჟა გაფრინდაშვილი პარასკევს, 13 დეკემბერს თავისუფალი იქნებოდა.
„ე.ი. ყველაზე გვიან, პარასკევს, ბატონი ვაჟა იქნება სახლში, შეიძლება მანამდე გათავისუფლდეს, თუ არადა ყველაზე გვიან, პარასკევს ის იქნება სახლში. მე ვარ 100%-ით დარწმუნებული იმაში, რომ სასამართლო პროცესზე მას გაათავისუფლებენ. თუმცა მეც და ყველა ადამიანს გვერჩია, რომ დღეს ის უკვე სახლში ყოფილიყო”, - ამბობდა ბურჯანაძე.
13 დეკემბერს გავრცელებულ განცხადებაში „ერთიანი საქართველო დემოკრატიული მოძრაობის" ლიდერმა ნინო ბურჯანაძემ განმარტა, რატომ არ გამართლდა მისი განცხადება ვაჟა გაფრინდაშვილის გათავისუფლების თარიღის შესახებ.
ექიმის საქმეზე სხდომა 20 დეკემბერისთვის გადაიდო. ვაჟა გაფრინდაშვილი ოკუპირებულ ტერიტორიაზე ორთვიან წინასწარ პატიმრობაში რჩება.
რუსეთის საოკუპაციო ძალებმა ცნობილი ექიმი-ტრავმატოლოგი ვაჟა გაფრინდაშვილი 9 ნოემბერს ახალგორის რაიონში დააკავეს. მას დე ფაქტო ხელისუფლებამ ე.წ. საზღვრის განზრახ დარღვევის ბრალდება წაუყენა და 15 ნოემბერს ორთვიანი წინასწარი პატიმრობა შეუფარდა. ექიმის ოჯახი ვარაუდობს, რომ ვაჟა გაფრინდაშვილს ახალგორის რაიონში დაშავებული ადამიანისთვის დახმარების გაწევა სურდა.