გახარია: ხელისუფლების პასუხისმგებლობა იყო 20 ივნისის ღამეს პარლამენტის შტურმით აღება არ დაეშვა
„საგამოძიებო პროცედურები ყველა იმ საქმესთან დაკავშირებით, რომლებსაც თქვენ შეეხეთ, დასრულებულია. ახლა სასამართლო ეტაპზეა. მე როგორც ვიცი, პარლამენტზე შტურმის და პოლიციელზე თავდასხმის ბრალდებით დაკავებული პირების 99%-მა დანაშაული აღიარა. იქ შესაბამისი პროცედურები მიმდინარეობს.
ის, რომ გარკვეული პოლიტიკოსები ან ორი პოლიტიკოსი... ეს ჩვენი პოლიტიკური პროცესის სისუსტის მაჩვენებელია, მეტი არაფერი. მერწმუნეთ, ნებისმიერ სხვა დასავლურ ქვეყანაში მსგავსი, რამ რომ მომხდარიყო, ამას ექნებოდა სულ სხვა სამართლებრივი და პოლიტიკური შედეგები. ზოგ ნაწილში სამართლებრივი და ზოგში - პოლიტიკური. ჩვენ გარდამავალ ეტაპზე მყოფი დემოკრატია ვართ და ნელ-ნელა ყველაფერს ვსწავლობთ“, - ამბობს გახარია.
შინაგან საქმეთა ყოფილი მინისტრი განმარტავს, რა იყო 20 ივნისს ხელისუფლების პასუხისმგებლობა. „ხელისუფლების პასუხისმგებლობა იყო, ასევე, რომ 20 ივნისის ღამეს პარლამენტის შტურმით აღება არ დაეშვა. ამ პასუხიმგებლობის განხორციელების დროს გარკვეული, სამწუხარო შედეგები დადგა ყველა ჩვენგანისთვის, ჩემთვის პირველ რიგში, მაგრამ ეს ხო მაშინდელი შინაგან საქმეთა მინისტრის, რომლის ფუნქციასაც მე ვასრულებდი, პირდაპირი პასუხისმგებლობა იყო“, - თქვა გახარიამ.
პრემიერ-მინისტრი 20 ივნისს ხელისუფლების მოქმედების შედეგებზე ამახვილებს ყურადღებას. „კონცეპტუალურად და პოლიტიკურად ჩვენ თუ ამ ყველაფრიდან გამოვიტანთ ისეთ გაკვეთილს, რომელიც ჩვენი მომავალი თაობის, მაგალითად, ჩემი შვილის პოლიტიკურ ცხოვრებაში არ განმეორდება - საქართველოს პარლამენტზე თავდასხმა პოლიტიკური მიზნის მისაღწევად. ეს უკვე საკმაოდ წინ გადადგმული ნაბიჯი იქნება და მერწმუნეთ, მე, როგორც ცალკე აღებული რიგითი მოქალაქე ამ ქვეყნის, ამით დავკმაყოფილდები. მე მახსოვს, სკოლის მოსწავლე ვიყავი, რას ნიშნავდა პარლამენტის შტურმი. ისიც მახსოვს, ამის შემდგომ ქვეყანა რა სახის და მნიშვნელობის ტურბულენტობაში შევიდა. მერე მახსოვს მეორე შტურმიც.
ჩვენ თუ არ მივაღწიეთ იმას, რომ ქვეყანაში პოლიტიკური ცვლილებები ხდება არა ძალადობის გზით, პარლამენტზე შტურმითა და პარლამენტში შეჭრის გზით, არამედ საარჩევნო ურნასთან... ეს უკვე მერწმუნეთ, გარდამავალი დემოკრატიისთვის არის საკმაოდ სერიოზული წარმატება.
მე მიმაჩნია, რომ ის სამწუხარო, ზოგ შემთხვევაში ტრაგიკული შემთხვევები, რაც 20 ივნისს მოხდა, ეს მუდმივი ტვირთი იქნება ჩვენთვის, მაგრამ გაკვეთილი და შედეგი ამისა, უნდა იყოს ეს - დარწმუნებული ვარ, ჩვენს ცხოვრებაში მსგავსი არაფერი არ უნდა განმეორდეს“, - აცხადებს მთავრობის მეთაური.
გახარიას თქმით, 20 ივნისის მოვლენებს სამართლებრივი შეფასება დიდწილად მოჰყვა, პოლიტიკური შეფასება კი ოქტომბერში [საპარლამენტო არჩევნებზე] იქნება.
2019 წლის 20-21 ივნისს მოქალაქეების პროტესტი რუსი დეპუტატის, სერგეი გავრილოვის საქართველოს პარლამენტის თავმჯდომარის სკამიდან სხდომის წაყვანამ გამოიწვია.
კომუნისტი დეპუტატი, რომელსაც ხმა აქვს მიცემული აფხაზეთისა და სამხრეთ ოსეთის დამოუკიდებლობისთვის, საქართველოში მართლმადიდებელი საპარლამენტთაშორისო ასამბლეის ფორუმზე იმყოფებოდა.
20-21 ივნისის ღამეს აქციის დარბევისას დაშავდა 200-ზე მეტი ადამიანი, მათ შორის 30-ზე მეტი ჟურნალისტი. 2-მა ადამიანმა დაკარგა თვალი, 2 ადამიანი აქციის დარბევიდან რამდენიმე დღის განმავლობაში საავადმყოფოში მართვით სუნთქვაზე იმყოფებოდა.
საპროტესტო აქციები 20 ივნისის შემდეგ ყოველდღიურ რეჟიმში სამი თვის განმავლობაში იმართებოდა - აქციების მთავარი მოთხოვნა არჩევნების წესის ცვლილება, დაკავებულების განთავისუფლება და შს მინისტრის, გიორგი გახარიას გადადგომა იყო.
3 სექტემბერს მაშინდელი შინაგან საქმეთა მინისტრი გიორგი გახარია პრემიერ-მინისტრობის კანდიდატად „ქართული ოცნების” ლიდერმა, ბიძინა ივანიშვილმა წარადგინა.