Որևէ կերպ չի կարելի թույլ տալ Հայաստանի սահմանազատման մասին փաստաթղթի ստորագրում, դա վերջին մեխը կլինի մեր պետականության վրա. Աննա Գրիգորյան (տեսանյութ)
Վարչապետի պաշտոնակատարը պետք է օր առաջ թողնի իր պաշտոնը, չի կարելի որևէ կերպ թույլ տալ այն փաստաթղթի ստորագրումը, որը վերջին մեխն է լինելու մեր պետականության վրա. ամիսներ շարունակ ընդդիմությունը փորձեց ցույցերով հեռացնել վարչապետին, դա չհաջողվեց, և դժվար է ասելը՝ ինչո՞ւ հայ ժողովուրդը չի արթնանում թմբիրից, ինչո՞ւ չի հասկանում, թե ինչ մասշտաբային արհավիրքի առջև ենք կանգնած: «Արմնյուզ» ՀԸ «#ՕրաԽնդիր» հաղորդման ժամանակ նման կարծիք է հայտնել «Հայաստան» դաշինքի անդամ, «Վերածնվող Հայաստան» կուսակցության փոխնախագահ Աննա Գրիգորյանը:
«Այդ փաստաթուղթն ամեն վայրկյան կարող է ստորագրվել: Վարչապետին երեկ լսելիս ակնկալում էի, թե հրապարակները պետք է լցվեն: Մեր մեջքի հետևում կնքված բոլոր փաստաթղթերից հետո կարծում էի, թե գոնե սա ցնցում կառաջացնի մեր հանրության մեջ: Քաղաքական գործիչները մեծապես սխալվել են ընդդիմադիր պայքարն ավարտին չհասցնելու գործում: Մեր հասարակությունը բևեռացված է քաղաքական հարցերում, և դժվար է գտնել այն կառավարիներին, որոնց կհաջողվի եղանակ փոխել»,- ասել է ԱԺ անկախ պատգամավորը:
Ըստ Գրիգորյանի՝ Սյունիքի սահմանամերձ դարձած համայնքներում բնակիչներն արդեն հերթապահելով են քնում՝ թշնամուց զգուշանալով. «Հենակետերը պետք է ամրացնել, կահավորել: Մեր զինվորին ծեծելու հայտնի տեսանյութն ազգային արժանապատվության ոտնահարում էր, ՊՆ-ն նույնիսկ տեղյակ չէ դրա մասին: Մեր երկրում տոտալ քաոս է, չկա մեկը, որն այս աղետի համար պատասխան կտար: Չի ստացվել այլ կերպ հեռացնել այս իշխանությանը, ընտրությունն էլ լավագույն տարբերակը չէ, բայց չի կարելի դրանից հրաժարվել»:
Քաղաքական գործչի կարծիքով՝ ընդդիմադիր ուժերի միավորումը կարող է տեղի ունենալ ընտրություններից հետո՝ կոալիցիայի տեսքով. «Մարդիկ պետք է գնան ընտրական տեղամաս և չընտրեն գործող իշխանությանը: Այն վերարտադրվելու որևէ շանս չունի: Քվեարկության առաջին արդյունքներով միգուցե և իշխանություն չձևավորվի, բայց դրան հաջորդող գործընթացով հանգուցալուծումը կգտնվի: Բոլոր ընդդիմադիր ուժերը պետք է հայտարարեն, որ ՔՊ-ի հետ կոալիցիա չեն կազմելու, պետք է այդ լյուստրացիան լինի, և մենք հասկանանք՝ ով ինչ ուղղությամբ է շարժվում»:
«Հայաստան» դաշինքի անդամի պնդմամբ՝ իշխանության վարկանիշն օր օրի իջնում է, այլ կերպ չէր կարող լինել: «Եթե նոյեմբերի 9-ի հայտարարության մասին ասվում էր, թե դրանով կյանքեր են փրկվում, հիմա ի՞նչ է արվում: Նախորդ իշխանությունները մեղավոր չեն, որ այս ամիսներին սահմանագիծը չի կահավորվել, գերիները դեռևս Բաքվի բանտերում են: Վարչապետը տարբեր մանիպուլյատիվ հնարքներով մեղքը բարդում է այլ մարդկանց վրա: Արցախը, անկլավները այն բեռն են, որոնց գնով գնում ենք խաղաղությա՞ն: Եթե այդ խաղաղությունն արժանապատիվ չէ, մենք կործանված ժողովուրդ ենք: Մենք կորցրել ենք ինքնիշխանությունը և պետականության պահպանման կռիվ ենք տալիս»,- ամփոփել է «Վերածնվող Հայաստան» կուսակցության փոխնախագահը:
Դավիթ Սարգսյան