შვედეთმა შეაჩერა ავღანეთში დეპორტაცია, რადგან ვითარება, უსაფრთხოების მხრივ, უარესდება

შვედეთმა გამოაცხადა, რომ წყვეტს ყოველგვარ  დეპორტაციას ავღანეთში, რადგან ომით განადგურებულ ქვეყანაში უსაფრთხოების ვითარება სწრაფად უარესდება.


"გადაწყვეტილება დაუყოვნებლივ შედის ძალაში და იმოქმედებს შემდგომ შეტყობინებამდე", - განაცხადა კარლ ბექსელიუსმა, შვედეთის საიმიგრაციო სააგენტოს იურიდიულ საკითხთა გამგემ, 16 ივლისს.


ამჟამად შვედეთში დეპორტაციის მოლოდინშია დაახლოებით 7000 ავღანელი თავშესაფრის მაძიებელი. ივლისის დასაწყისში, ავღანეთის ოფიციალურმა პირებმა მოუწოდეს ევროპის ქვეყნებს, სულ ცოტა, სამი თვით მაინც შეეჩერებინათ ავღანელი თავშესაფრის მაძიებლების დეპორტაცია.


ამ კვირის დასაწყისში ფინეთმა განაცხადა, რომ არავის დეპორტაციას არ მოახდენს ავღანეთში. ავღანეთი ახალი კრიზისის წინაშე დგას, რადგან თალიბანის მებრძოლები იპყრობენ ტერიტორიებს,  ავიწროებენ სამთავრობო ძალებს და რასაც მოჰყვა  ქვეყნის შიგნით ხალხის იძულებით გადაადგილების ახალი ტალღა. ვითარებას ართულებს კორონავირუსის პანდემია. 


ძალადობის აღზევების ფონია ოცწლიანი ომის შემდეგ შეერთებული შტატებისა და საერთაშორისო ძალების ქვეყნიდან გასვლის დაწყება მაისის შემდეგ, რაც აგვისტოს ბოლოს უნდა დასრულდეს.