Putin Ukraina arbiylerini «akimiyetni öz qoluna almalarına» çağırdı

Rusiye prezidenti Vladimir Putin Rusiye Federatsiyasınıñ şurasınen toplaşuv keçirip, Ukraina arbiylerini «akimiyetni öz qoluna almalarına» çağırdı ve «Kyivde oturğan ve bütün Ukraina halqını reine tutqan narkomanlar ve neonatsistler çetesine köre siznen añlaşmaq daa qolay olur», dep ayttı.

«Neonatsist ve bendercilerge bala, apay ve qartlarıñıznı canlı qalqan olaraq qullanmağa imkân bermeñiz», – dedi Putin. 

Onıñ aytqanına köre, olar «terroristler kibi areket ete». 

Rusiye prezidentiniñ matbuat kâtibi Dmitriy Peskov Rusiye Minskte Ukraina ile muzakere keçirecek eyyetni yollamağa azır, dep bildirdi. 

Ukraina prezidenti Volodımır Zelenskıy video muracaatı vaqtında Putinni «insanlarnıñ ölmesini toqtatmaq içün muzakereler masasına» oturmağa çağırdı.

Soñra belli olğanına köre, Putin Qıtay Halq Cumhuriyetiniñ reisi Si Tszinpin ile telefonda laf etip, «Rusiye Ukraina ile yüksek seviyede muzakereler keçirmege azır», dep bildirdi. 

Ukrainada Rusiye ücüm etken soñ arbiy vaziyet ilân etildi. Fevralniñ 24-nde saba saat 5-te Rusiye prezidenti Vladimir Putin «DNR» ve «LNR» gruppirovkalarınıñ «muracaatından» soñ Donbasta «mahsus operatsiya» başlatqanını ilân etti.

Ücümge baqmadan, Kreml Ukrainanı işğal etmek niyetlerini red ete. Rusiye resmiy müessileri ücümnen bağlı vaziyetni pek az izaatlay, Ukraina tarafınıñ ölgen ve esir alınğan Rusiye arbiyleri aqqında malümatına cevap bermey. 

Rusiye Mudafaa nazirligi snarâd ve raketalar mesken evlerge tüşkenini red ete, vatandaşlar arasında qurbanlar videosını nazirlik vekili «sahte» dep adlandırdı. Onıñ aytqanına köre, bunı «barışıqsever ealini qorquzmaq ve ğarbiy kanallarda köstermek» içün yapalar.