ხუთი დღით იხსნება იზოლირებული ახალგორის გზა
ხუთშაბათს ოკუპირებული ახალგორის თბილისთან დამაკავშირებელი გზა გაიხსნება. ამის შესახებ სოციალურ ქსელში ახალგორელმა სამოქალაქო აქტივისტმა, თამარ მეარაყიშვილმა სპეციალური სტატუსი დაწერა. მისი თქმით, გზა დე ფაქტო რესპუბლიკის მოქალაქეობის და საშვების მქონე მოქალაქეებისთვის იხსნება.
„განმარტება გზის გახსნასთან დაკავშირებით, რაც ვიცი ამ დროისთვის. გზა იხსნება მათთვის, ვისაც აქვს ჩაწერა - სამხრეთ ოსეთის მოქალაქის პასპორტი ან საშვი - "პროპუსკი". ნუ გაბრაზდებით, ვინც ამჯერად ვერ შეძლებთ საბუთის არქონის გამო ესტუმროთ ოჯახს ან საფლავებს. ჩემი შვილიც ვერ ჩამოვა - არ აქვს არანაირი დოკუმენტი. იხსნება ორივე მიმართულებით - აქედან წახვალთ და დაბრუნდებით, ჩამოხვალთ და უკან დაბრუნდებით 5 დღის ვადაში. მანქანებით გადაადგილება არ იქნება შესაძლებელი - აქ მანქანით ვერ შემოხვალთ. საგუშაგომდე მოხვალთ და ან ტაქსის გამოიძახებთ, ან ახლობელი დაგხვდებათ. ვინც მიდიხართ ან მოდიხართ, ერთმანეთს გაუმართეთ ხელი... განსაკუთრებით მათ, ვინც თავად ვერ ახერხებს ამას. მე ისევ ვერ ვახერხებ გადაადგილებას- სასამართლოს გადაწყვეტილებით, მაგრამ არა უშავს. კეთილი მგზავრობა", - წერს სოციალურ ქსელში თამარ მეარაყიშვილი.
ახალგორიდან რადიო თავისუფლების ერთ-ერთი წყარო იმასაც გვატყობინებს, რომ ორი დღით ადრე საჯარო დაწესებულებებში ხელმოწერების შეგროვება დაიწყეს. როგორც უთხრეს, ეს გზის გახსნას ეხებოდა, თუმცა ხელმოწერების ფურცელს თავსართი არ ჰქონდა, ამიტომ ჩვენი წყარო ვარაუდობს, რომ შესაძლოა, ეს ხელმოწერები ბიბილოვმა ე.წ. რეფერენდუმის ჩატარებისთვის, შესაბამისი სამართლებრივი ნაბიჯების კონტექსტში გამოიყენოს.
წყარო იმასაც გვეუბნება, რომ ბევრი ადამიანი აპირებს ნათესავების მონახულებას როგორც ერთ ისე მეორე მხარეს. გარდა ამისა, ჩაკეტილი ახალგორის გახსნის საკითხი განიხილებოდა, 12 აპრილს ერგნეთში გამართულ ინციდენტების პრევენციის და მათზე რეაგირების მექანიზმის სამუშაო ჯგუფის შეხვედრაზე. შეხვედრის დასრულების შემდეგ, შერიგებისა და სამოქალაქო თანასწორობის საკითხებში სახელმწიფო მინისტრის წარმომადგენელმა ზვიად ზვიადაძემ განაცხადა, რომ დე ფაქტო ხელისუფლების და რუსეთის მხარის წარმომადგენლებს შესთავაზეს ჰუმანიტარული საკითხების სააღდგომოდ გადაჭრა. ეს საკითხი იძულებით გადაადგილებული პირების მიერ ოკუპაციის ხაზს მიღმა მოქცეული ნათესავების საფლავების და სალოცავების მონახულებას ეხებოდა.
ზვიადაძემ მაშინ განაცხადა, რომ წინადადებაზე დე ფაქტო და რუსეთის მხარეების პასუხს ელოდება ცხელი ხაზის მეშვეობით და ამ საკითხზე შესაძლოა დამატებით ტექნიკური შეხვედრაც გაიმართოს. გავრცელებული ინფორმაციით, ახალგორის გზა ხუთშაბათიდან, მომდევნო კვირის ორშაბათამდე იქნება გახსნილი. დე ფაქტო რესპუბლიკის ე. წ პრეზიდენტმა „რაზდახანის“ (მოსაბრუნის) ე.წ გამშვები პუნქტი 2019 წლის სექტემბერში ჩაკეტა და ახალგორის მოსახლეობა იზოლაციაში მოაქცია. ამის შემდეგ გზა რამდენჯერმე, განსაკუთრებული შემთხვევების გამო გაიხსნა. ბიბილოვი ხაშურის მუნიციპალიტეტის სოფელ ჩორჩანაში განთავსებული საპოლიციო საგუშაგოს აღებას მოითხოვს, რადგან მიჩნევს, რომ საქართველოს შინაგან საქმეთა სამინისტრომ ეს საგუშაგო ოკუპირებულ წნელისში განათავსა. დე ფაქტო პრეზიდენტმა ამ საგუშაგოს აღებამდე, ახალგორი ჩაკეტა. ახალგორის მცხოვრებლებმა კი ბიბილოვის ამ გადაწყვეტილებას 10 აპრილის ე.წ საპრეზიდენტო არჩევნებში უპასუხეს. დაბაში მისმა კონკურენტმა ალან გაგლოევმა 4-ჯერ მეტი ხმა მიიღო. გაგლოევი წინასაარჩევნო შეხვედრისას ახალგორელებს შეპირდა, რომ თანამდებობის დაკავების შემთხვევაში გზას გახსნის.