ნიკოლოზ რაჭველი: … დღეს უფრო მეტად მოინდომებს უკრაინის მხარდაჭერას სიტყვით თუ საქმით, აზრით თუ ქველმოქმედებით
“11 აპრილის საქველმოქმედო მარათონმა თითქოს გადამავიწყა 9 აპრილს გამართული ეროვნული სიმფონიური ორკესტრის სოლიდარობის საღამო ოპერის თეატრში.
სულ ვფიქრობ კონცერტების ჩატარებით როგორ უნდა ვშველოდეთ ახლა ომის და ენით აუწერელი სისასტიკის პირობებში მყოფ უკრაინელ ხალხს… არა, ვერ ვშველით, თუ ვინმეს შველის ეს თავად ჩვენ ვართ, რომ ჩვენს სულებში დაბუდებული სიმწრის ვულკანი გადმოვაფრქვიოთ და ერთმანეთს გავუზიაროთ… მათ, უკრაინელებს კი ეს ყველაფერი ამხნევებს, უსაზღვროდ ამხნევებს და გულებს უთბობს… უცნობი მოქალაქეების ათეულობით მადლობის წერილი მივიღე კიევიდან, ხარკოვიდან, ოდესიდან, ლვოვიდან, მარიუპოლიდანაც კი… ვკითხულობ და განუწყვეტლად მომდის ცრემლები…
რა შეუძლია გააკეთოს ომში ხელოვნებამ?
გუშინდელი მაგალითით ვუპასუხებ ჩემსვე დასმულ შეკითხვას:
ჰანს ციმერის ევროპის ტურნეს გრანდიოზულ ლაივზე ვიყავი დაპატიჟებული ბერლინში, 20 ათასზე მეტი ბერლინელი თუ უცხოელი ტურისტი ესწრებოდა საღამოს, ლეგენდარული კინოკომპოზიტორის კონცერტის მთლიანი ვიზუალური დიზაინი (დეკორაცია, განათება) ლურჯ და ყვითელ ფერებში იყო გადაწყვეტილი, პირველივე სიტყვა უკრაინას და ომს მიუძღვნა, სცენაზე განსაკუთრებული რევერანსით წარადგინა ოდესელი მუსიკოსებისგან სახელდახელოდ შეკრებილი სიმფონიური ორკესტრი, რომელთაც მთელი დარბაზი ფეხზე წამოუდგა, ოსკარებით და გრემებით განებივრებულმა კომპოზიტორმა მკაფიოდ დააფიქსირა მისი დიდი პროტესტი რუსეთის აგრესიის მიმართ, უკრაინას გამარჯვება და მსოფლიოს დროულად გამოფხიზლება უსურვა…
სახლებსა თუ სასტუმრებში დაბრუნებული მრავალათასიანი მაყურებელი, რომელიც დარბაზში ჰანს ციმერის თაყვანისცემამ მიიყვანა დღეს უფრო მეტად მოინდომებს უკრაინის მხარდაჭერას სიტყვით თუ საქმით, აზრით თუ ქველმოქმედებით… 
მარტო ერთმა ჯამალამ 88 მილიონი ევროს შეგროვება შეძლო მისი ქვეყნის არმიისათვის ერთი თვის განმავლობაში…

ეს არის ალბათ ომში ჩვენი, მუსიკოსების მისია, სიმართლისკენ ყოფნა მკაფიოდ, სიბოროტისადმი და უსამართლობისადმი პროტესტი ხმამაღლა, ჩვენი ბგერებით, ჩვენი ტკივილიანი ემოციებით და გასაჭირში მყოფთათვის იმედიანი ჰარმონიის გაზიარებით!!!
Слава Украiнi!!!
დიდება ქართველ და უკრაინელ გმირებს!!!
მალე დამდგარიყოს ჩვენი გამარჯვება!!!
Video: Tengiz Giorgbelidze & Nutsa Jorbenadze
” – წერს სოციალურ ქსელში კომპოზიტორი ნიკოლოზ რაჭველი.