დაღესტანში მობილიზაციის საწინააღმდეგო აქციაზე პოლიციამ ჰაერში ისროლა
მედიაში გავრცელებული ცნობებით, ენდირეიში მობილიზაციის ფარგლებში გამოიძახეს 110 ადამიანი, მათ შორის ისინი, ვინც ახლახან დაბრუნდა არმიიდან.
მაჰაჩყალაში პოლიციამ დააკავა მობილიზაციის საწინააღმდეგო აქციის რამდენიმე მონაწილე, იუწყება გამოცემა "Кавказский узел". აქციის მსვლელობისას პოლიციელებს დემონსტრანტებისგან გაქცევა უწევდათ.
აქციის მონაწილეებმა პოლიციის მანქანებს გზა გადაუკეტეს და შეეცადნენ პოლიციის იძულებას გაეთავისუფლებინა დაკავებულები. ტელეგრამით გავრცელებული ვიდეოებიდან ჩანს, რომ პოლიციელმა ერთ-ერთ დემონსტრანტ ქალს დაარტყა.
რუსეთში მობილიზაცია დაიწყო 21 სექტემბერს, ხელისუფლებამ გამოაცხადა გეგმა არმიას დაემატოს 300 ათასი რეზერვისტი, რომლებსაც გავლილი აქვთ სამხედრო სამსახური და აქვთ საომარ მოქმედებებში მონაწილეობის გამოცდილება. თუმცა ვრცელდება ცნობები, რომ უწყებები მისდით იმ მოქალაქეებსაც, რომლებიც ამ კრიტერიუმებს არ აკმაყოფილებენ.
დაღესტნიდან იუწყებიან, რომ სამობილიზაციო პუნქტებში იბარებენ მრავალშვილიან მამებს, რომლებსაც მცირეწლოვანი შვილები ჰყავთ, საომარი გამოცდილების არმქონე კაცებს და რიგითებს, რომელთა ასაკი აჭარბებს 35 წელს.