بېنیټ: طالبان دې د وروستیو لاریونونو پرمهال نیول شوي معترضان خوشې کړي
د افغانستان لپاره د ملګرو ملتونو د بشري حقونو ځانګړي راپور ورکوونکي له طالبانو د هغو کسانو د سمدستي خوشې کېدو غوښتنه وکړه چې د نجونو او ښځو پر مخ د پوهنتونونو د دروازو د تړلو پرضد د اعتراض له امله نیول شوي دي.
ریچارډ بېنیټ پرون په ټویټر کې ولیکل چې داسې خواشینوونکي راپورونه خپاره شوې دي چې په کابل، ننګرهار او تخار کې ښځینه احتجاج کوونکې او خبریالان وهل شوي او نیول شوې دي.
وروسته تر دې چې د طالبانو حکومت د سې شنبې په ورځ تر امر ثاني پورې د نجونو او ښځو پر مخ د پوهنتونونو او تعليمي موسسو دروازې وتړلې په کابل، جلال اباد او ځینو نورو ښارونو کې افغانانو مظاهرې وکړې.