«Адымнар-Әлмәт» күптелле гимназиясендә Ризаэддин Фәхреддингә багышланган чара булды
«Адымнар-Әлмәт» күптелле гимназиясендә татар теле һәм әдәбияты укытучылары Ризаэддин Фәхреддиннең тормыш һәм иҗат юлына багышланган түгәрәк өстәл утырышы уздырды. Бу хакта Татарстан Язучылар берлегенең матбугат хезмәте хәбәр итә.
Очрашуга язучы, әдәбият белгече, укытучы, филология фәннәре кандитаты, доцент, Татар язучылар берлеге әгъзасы, Язучылар берлегенең Әлмәт бүлеге җитәкчесе, «Әлмәт таңнары» газетасының баш мөхәррире Рәфкать Шириаздан улы Шаһиев килде. Ул Ризаэддин Фәхреддин кызы Әсма Шәраф белән, әле егет чагында ук, ничек танышып китүен, хатлар алышуын, аралашып яшәвен сөйләде.
«Дөреслегенә үзең ышанмаганны сөйләмә дә, язма да», – дигән сүзләрне инде ничә еллар элек Әсма Шәрафтан ишеткән идем. Әлеге сүзләргә мин һаман да таянып эшлим һәм биредә утырган укучыларга да нәсихәт итеп әйтәсем килә», – диде ул. Укучылар исә аеруча кызыксынып тыңлады. Үзләренә матур тәэссирләр алып, хәтта мәкаләләр язарга да кызыгып калдылар.
Рәфкать Шаһиев үзе белән җилпәзә дә алып килгән иде. Ул Ризаэддин Фәхреддиннең кече кызы кулланылышында булган. Җилпәзә бик иске булуына карамастан, әле дә яхшы хәләттә. Р.Фәхреддиннең гаиләсе, хезмәте буенча фотосурәт күргәзмәсе һәм Р.Фәхреддин китаплары, аның турында язылган башка авторлар китаплары күргәзмәләре әзерләнде.
Р.Фәхреддиннең тормыш юлы, яшәеше, хезмәте белән тулырак таныштыру өчен презентация һәм кинофильм күрсәтелде.