Зәй имам-мөхтәсибе Сәгыйть хәзрәт Камаловның экспонатлары музейга тапшырылды

Туган як тарихын өйрәнү музеена Зәй муниципаль районының Мактаулы гражданины, озак еллар районда имам-мөхтәсиб булып хезмәт куйган Сәгыйть хәзрәт Камаловның хатыны Вәсимә апа кызы Фәния һәм оныгы белән килде.

Сәгыйть хәзрәт чирек гасырдан артык намус белән зәйлеләрне рухи агартуга хезмәт итте, күп кенә мәчетләр төзелешен башлап йөрде, 13 ел Зәй районы имам-мөхтәсибе җаваплы вазифасын башкарды, 2016 елдан Татарстан Диния нәзарәтендә аксакаллар шурасы әгъзасы буларак, шураның Зәй бүлеген җитәкләде. Бу хакта «Зәй хәбәрләре» сайтында хәбәр ителә.

Ул һәрвакыт тынгысыз, ышанычлы һәм җаваплы мөхтәсиб, ихлас кеше булды. Мәгънәле, үтемле үгет-нәсихәтләре, мәрхәмәтлелек, миһербанлылык һәм дә шәфкатьлелек тәрбияләүгә юнәлтелгән вәгазьләре белән яшьләрне тугры, гадел, иманлы гамәлләргә өндәде. Ислам диненең иң яхшы гореф-гадәтләрен саклап калу, милләтне рухи камиллеккә күтәрү кебек изге эшләрне күп башкарды. Күренекле татар дин белгече, мәгърифәтче, тарихчы һәм табиб Таҗетдин Ялчыгол истәлегенә районда укулар уздыруны оештырып җибәрде.

Вәсимә ханым Сәгыйть хәзрәтнең һәр башлангычын хуплап, тугры ярдәмчесе булды. Ул музейга хәзрәтнең документларын һәм шәхси әйберләрен бүләк итте. Алар арасында күкрәк билгесе һәм Мактаулы гражданин таныклыгы, ТР мөселманнары Диния нәзарәтенең ислам динен кабул итүенә 1000 ел тулу уңаеннан Казан югары мөселман мәдрәсәсендә яклаган диплом проекты, вәгазь текстларын җыйган басма машинкасы, хаҗ сумкасы һ.б.лар бар.

«Яңа экспонатлар музей экспозицияләрендә һәм фондларында лаеклы урын алачак. Кунаклар музейның заллары буйлап экспозицияләрне карады һәм Сәгыйть хәзрәт турында җылы истәлекләре белән уртаклашты», - ди музей хезмәткәрләре.