ԱՄՆ-ի պետքարուղարությունը կոչ է արել քաղաքացիներին «անհապաղ լքել» Բելառուսը Լիտվայի կողմից անցակետերի փակման պատճառով
Միացյալ Նահանգերի պետական քարուղարությունը կոչ է արել ԱՄՆ-ի քաղաքացիներին «անհապաղ լքել» Բելառուսը։ Այս մասին ասվում է Մինսկում ԱՄՆ դեսպանատան կայքում հրապարակված մամուլի հաղորդագրության մեջ։
«Բելառուսում ԱՄՆ քաղաքացիները պետք է անհապաղ լքեն երկիրը: Դիտարկեք Լիտվայի և Լատվիայի հետ մնացած սահմանային կետերով կամ ինքնաթիռով հեռանալու հնարավորությունը: ԱՄՆ քաղաքացիներին չի թույլատրվում Բելառուսի ցամաքային ճանապարհով մուտք գործել Լեհաստան»,- ասվում է հայտարարության մեջ։
Օգոստոսի 18-ից Լիտվան դադարեցրել է Բելառուսի հետ սահմանի 6 ճանապարհային անցակետերից երկուսի գործունեությունը «աշխարհաքաղաքական իրավիճակի և ազգային անվտանգության սպառնալիքները նվազեցնելու համար»։
Մինսկում Վիլնյուսի գործողությունները որակել են հերթական «ոչ կառուցողական և ոչ բարեկամական քայլը»։ Բելառուսի Պետական սահմանային կոմիտեի տվյալներով՝ 2022 թվականից ի վեր Լատվիայի, Լիտվայի և Լեհաստանի ավելի քան 685 հազար բնակիչ օգտվել է երկիր առանց վիզայի մուտքի իրավունքից․ մեծամասնությունը Լիտվայի քաղաքացիներ են։
Ավելի վաղ ТАСС-ին Բելառուսի ԱԳՆ մամուլի ծառայությունը հայտնել էր, որ Բելառուսը Լիտվայի կողմից սահմանին անցակետերի փակմանը կարձագանքի «հանգիստ, պատասխանատու և պրագմատիկ՝ նաև հաշվի առնելով հարևան երկրների բնակիչների շահերը»։