ანკა გუჯაბიძის ფილმი, "თემო რე" როტერდამის კინოფესტივალის მოკლემეტრაჟიანი პროგრამის გამარჯვებულია
"თემო რე" არის მსახიობის და მწერლის, თემო რეხვიაშვილის სადებიუტო რომანის, "კურიერის ამბების" ეკრანიზაცია, რომელიც ეფუძნება შავ-თეთრი ფოტო მონტაჟის ფორმატს და აერთიანებს როგორც მხატვრული, ისე დოკუმენტური კინოს ელემენტებს. ამ, ტრაგიკომიკური სიუჟეტის ფილმში მთავარ როლს თავად თემო რეხვიაშვილი ასრულებს - მისი პერსონაჟი, თემო, პროფესიით მსახიობია, თუმცა ხელმოკლეობის გამო კურიერადაც უწევს მუშაობა. თემო ერთი დღის განმავლობაში თბილისში მოპედით გადაადგილდება, და საღამოს გარეუბნის ერთ-ერთ თეატრში უფლისწულის როლს თამაშობს ისტორიული შინაარსის სპექტაკლში. დღის განმავლობაში განცდილი და ნანახი სიღარიბის, უსამართლობის, კორუფციისა და გაუცხოების სურათები ღამით თემოს დამზაფვრელ ხილვაში გადაიზრდება.
3 თებერვალს გამართულ დაჯილდოების ცერემონიაზე ფილმის ავტორებმა საქართველოში შექმნილ პოლიტიკურ კრიზისზეც ილაპარაკეს. "საქართველოში ვითარება კატასტროფულია. რუსეთს იმპერიალისტური მისწრაფებებით სურს საქართველოს კონტროლი, ქვეყანაში საპროტესტო ტალღაა. ჩემი და თემოს მსგავსი ადამიანები ახლა ციხეში არიან და მათ წლების განმავლობაში ემუქრებათ პატიმრობა. ეს აუცილებლად უნდა დასრულდეს" - თქვა ანკა გუჯაბიძემ.
"თემო რე" გადაღებულია საპროდიუსერო მხარდაჭერის და ოფიციალური დაფინანსების გარეშე. ფილმზე მუშაობის ბოლო ეტაპზე ავტორებმა საზოგადოებას მიმართეს დახმარების თხოვნით - საბოლოო მონტაჟის და ხმის კორექციისთვის თანხა სოციალური მედიით შეგროვდა.