ტრამპი იმედს გამოთქვამს, რომ რუსეთი სწორ საქმეს გააკეთებს უკრაინასთან დაკავშირებით

აშშ-ის პრეზიდენტმა, დონალდ ტრამპმა ხუთშაბათს განაცხადა, რომ მისი საგანგებო წარმომადგენელი, სტივ უიტკოფი რუსეთთან სერიოზულ მოლაპარაკებებს აწარმოებს უკრაინაში ომის დასრულების შესახებ.

"იმედი მაქვს, ისინი სწორ საქმეს გააკეთებენ”, - განუცხადა ტრამპმა ჟურნალისტებს ნატოს გენერალურ მდივანთან, მარკ რიუტესთან შეხვედრისას ოვალურ კაბინეტში.

როგორც ტრამპმა განაცხადა, ის არ ფიქრობს, რომ რუსეთი თავს დაესხმება აშშ-ის მოკავშირეებს. "ეს არ მოხდება. ჩვენ ვიზრუნებთ იმაზე, რომ ეს არ მოხდეს", თქვა მან.

უიტკოფი პუტინს 13 მარტს, საღამოს ხვდება, იტყობინება Politico რუსულ სახელმწიფო საინფორმაციო გამოშვება "იზვესტიაზე" დაყრდნობით. პუტინის თანაშემწემ, იური უშაკოვმა უფრო ადრე განაცხადა, რომ აშშ-ის პრეზიდენტის სპეციალური წარმომადგენლის, სტივ უიტკოფის მოსკოვში ჩასვლის შემდეგ მისი და პუტინის შეხვედრა "დახურულ ფორმატში" გაიმართება.


დონალდ ტრამპმა ასევე განაცხადა, რომ არ აპირებს შეცვალოს თავისი გადაწყვეტილება 2 აპრილიდან ყველა სავაჭრო პარტნიორთან ფართო საპასუხო ტარიფების შემოღების შესახებ.

"ჩვენ წლების განმავლობაში გვძარცვავდნენ და აღარ გვინდა, რომ გვძარცვონ", - განაცხადა ტრამპმა ოვალურ კაბინეტში. მან დაიცვა ტარიფების გამოყენება, უარყო ბაზრის ბოლოდროინდელი ცვალებადობა და პირობა დადო, რომ ინვესტორები საბოლოოდ ნახავენ მოგებას იმისგან, რომ საქმეში ახლა ჩადებენ ფულს.

"ევროკავშირი ძალიან, ძალიან ცუდია", - თქვა მან. "ისინი უჩივიან Google-ს, უჩივიან Facebook-ს, უჩივიან ყველა ამ კომპანიას და მილიარდობით დოლარს იღებენ ამერიკული კომპანიებისგან".
ტრამპმა განაცხადა, რომ Facebook-ი წლის ბოლომდე 60 მილიარდი დოლარის დაბანდებას აპირებდა.