Гаиләсе янып үлгән баланы үз әтисе тәрбиягә алган
9 гыйнвар төнендә Лениногорск районы Иске Куак авылындагы янгында әнисен һәм 5 туганын югалткан малай үз әтисенә тәрбиягә бирелгән.
Әлеге яңалыкны Татарстанның бала хокуклары буенча вәкил Гүзәл Удачина җиткергән. "Без уйлаганча, әтисе табылды. Бу мәсьәләдә бернинди дә проблема тумады – ул һәрвакыт алимент түләп барган, имин тормыш алып бара, – дигән Гүзәл Удачина. – Әтилек хокукларын дәлилләү кебек формаль сорауларны да хәл итәргә туры килмәде. Бала никахта вакытта туган. Баланы тәрбиягә бирү буенча әбисе ягыннан да, ир-атның яңа гаиләсе тарафыннан да каршылыклар булмады".
Хәзер бала әтисе гаиләсендә Лениногорскида яши, яңа мәктәпкә күчерелгән.