Трамп Иранмен келіссөздерде қандай жеңілдіктерді қарастырмайтынын нақтылады
АҚШ президенті Дональд Трамп NBC News-ке берген сұхбатында Иранмен ықтимал келісім аясында қандай жеңілдіктерді қарастырмайтынын айтты: Тегеранға салынған санкциялар алдын ала алынбайды, бұл тек бейбіт келісім жасалғаннан кейін ғана мүмкін болады, деп хабарлайды Tengrinews.kz.
АҚШ президенті Дональд Трамп кез келген мәміле аясында ирандық активтерді алдын ала бұғаттан босатпайтынын немесе Ислам Республикасының басшылығына салынған санкцияларды алмайтынын мәлімдеді - бұл тек бейбіт келісімге қол қойылғаннан кейін ғана жүзеге аспақ.
"Бұл кейінірек болады. Егер олар өздерін дұрыс ұстаса, жақсы жұмыс атқарса, біз бұл туралы сөйлесе бастаймыз", - деді Трамп NBC News арнасының Meet the Press бағдарламасына берген сұхбатында.
Сондай-ақ Ақ үй басшысы Тегеранмен жасалатын қысқа мерзімді келісімге Ливанның қосылуын талап етпейтінін айтты.
Сонымен қатар ол Израильді Ливанда орналасқан "Хезболла" радикалды шииттік тобына "дәлірек" соққы беруге шақырды.
"Мен Ливандағы өмірдің жақсарғанын қалаймын. Мен "Хезболлаға" бағытталған соққылардың дәлірек болғанын қалар едім. Олар бұдан да нақтырақ болуы тиіс деп ойлаймын", - деді Трамп.
АҚШ президенті сұхбат барысында Иранның жоғарғы көшбасшысы Моджтаба Хаменеимен тікелей келіссөздер жүргізуге дайын екенін де жеткізді.
Бұған дейін БАҚ АҚШ пен Иран ақпаннан бері жалғасып жатқан әскери қақтығысты реттеу бойынша негіздемелік келісімге қатысты алдын ала уағдаластыққа қол жеткізгенін хабарлаған.
Сонымен бірге Трамп Иранмен жасалатын келісімді әлі мақұлдаған жоқ. БАҚ мәліметінше, ол өзінің негізгі талаптары орындалған жағдайда ғана мәмілеге келуге дайын, оның бірі - Тегеранның ядролық қару жасау жоспарынан бас тартуы.
Иран басшылығы да АҚШ-пен соғысты тоқтату туралы түпкілікті келісімге әлі қол жеткізілмегенін мәлімдеді.
Еске салайық, бұған дейін АҚШ Израильден “Иранға жауабын” тоқтата тұруды сұраған.