Сицилия жағалауынан жүздеген амфора бар ежелгі Рим кемесі табылды
Оқиға орнынан жүздеген амфора (негізінен шарап тасымалдауға арналған қыш ыдыстар), екі қорғасын зәкір өзегі және тағы бір қорғасын конструкциясы табылды. Алдын ала болжам бойынша, жәдігерлер біздің заманымызға дейінгі II–I ғасырларға тиесілі. Кеменің ұзындығы шамамен 21 метр, ені 6 метрді құрайды.
Италияның Мәдениет министрі Алессандро Джули бұл олжаны "кейінгі жылдардағы ең маңызды су асты археологиялық жаңалықтарының бірі" деп атады. Қазіргі уақытта сарапшылар кеменің апатқа ұшырау себептері мен жүк мәліметтерін зерттеп жатыр.
Кеме сынықтарын алдымен жергілікті балықшылар, кейін дайверлер байқаған. Дайвер Джакомо де Мола нысанды бастапқыда кәдімгі тас деп ойлағанын айтады.
"Су астында көрініс онша жақсы болмады. Үлкен қараңғы нысанды көргенде: "Кезекті бір үлкен тас шығар..." деп ойладым. Бірақ жақынырақ жүзіп барғанда, жүрегім тоқтап қала жаздады. Ол тас емес еді. Астында теңіз түбінде 2000 жылдан астам уақыт бойы жатқан жүздеген амфоралар көмілген алып алқап жатты! Жерорта теңізінің тыныштығында мүлгіп жатқан ежелгі Рим кемесі екен", - дейді Джакомо де Мола.
Археологтардың айтуынша, Жерорта теңізінің түбінде антикалық дәуірге тиесілі кемелер өте көп болуы мүмкін. 2023 жылы Римнің солтүстік-батысында біздің заманымызға дейінгі I–II ғасырларға жататын, жүздеген амфора тиелген тағы бір кеме табылған болатын.