Қуып жетіп, соққыға жыққан: Алматыда резонанс тудырған видеодағы жүргізуші ұсталды
Бұған дейін оқиға Сейфуллин даңғылындағы Forum СОО маңында болғаны хабарланған еді. Алдын ала мәлімет бойынша, қара түсті жол талғамайтын көлік жүргізушісі кері бұрылып, көлік ағынына қосылмақ болған, алайда басты жолмен келе жатқан өзге жүргізуші оған жол бермеген.
Осыдан кейін жол талғамайтын көлік жүргізушісі қарсыласының машинасын қуып жетіп, оны тоқтауға мәжбүрлеген. Екі көлік те тоқтаған кезде ер адамдар арасында жанжал шыққан. Жарияланған кадрлардан жол талғамайтын көлік жүргізушісі өзіне жақындаған ер адамды ұрғанын көруге болады.
Соққыдан ер адам асфальтқа құлап, есінен танып, денесі құрысып қалған. Өтіп бара жатқан адамдар көмекке ұмтылған, ал шабуыл жасаған адам дәрігерлер келгенше кетіп қалған. Зардап шегуші жедел жәрдем көлігінде есін жиған.
Полиция не деді?
Алматы полициясы сотқа дейінгі тергеу басталғанын хабарлады.
"Күдікті анықталып, ұсталды және уақытша ұстау изоляторына қамалды. Тергеу барысы Алматы полиция департаменті басшылығының бақылауына алынды", - делінген хабарламада.
Instagram-дағы бұл жарияланымды көру
Алматы қаласының ПД жарияланымы (@almaty.police)
Полиция жолдағы даулы жағдайлар тек заң аясында шешілуі тиіс екенін ескертеді. Жол қозғалысына қатысушыларға күш қолдану заңда белгіленген жауапкершілікке әкеп соғады.