Норвегия королі V Харальд қайтыс болды
Норвегия королі V Харальд 89 жасында дүниеден озды. Монарх 28 тамызда таңертең денсаулығының нашарлауына байланысты Осло университетінің ауруханасында қайтыс болды, деп хабарлайды Tengrinews.kz.
Бұл туралы Норвегия корольдік сарайы хабарлады.
"Бүгін мәртебелі король Харальд дүниеден өткенін терең қайғырып хабарлаймыз. Король Харальд жұма, 28 тамызда сағат 06:35-те Риксхоспиталет ауруханасында өмірден озды", - делінген корольдік үйдің мәлімдемесінде.
Оның мұрагері ұлы, ханзада Хокон болды, ол есімін таңдап, кейін ант береді.
Харальд V 1937 жылы 21 ақпанда болашақ король V Улаф мен кронханшайым Мартаның отбасында дүниеге келген. Нацистік Германия Норвегияны оккупациялағаннан кейін корольдік отбасы елден кетті. Харальд балалық шағын Швеция мен АҚШ-та өткізді, кейін Норвегияға оралып, Әскери академияны бітірді.
1991 жылы қаңтарда әкесі қайтыс болғаннан кейін Харальд таққа отырды. Ол 35 жылдан астам уақыт Норвегия королі болды және Еуропадағы ең танымал монархтардың бірі саналды. Оның рөлі негізінен өкілдік және рәсімдік сипатта болды, бірақ ол ұлттық трагедиялар кезінде ел бірлігінің символы ретінде бірнеше рет бой көрсетті.
Король желкенді спортқа деген қызығушылығымен танымал болды. Ол өз командасымен бірге Олимпиада ойындарына қатысып, Әлем және Еуропа чемпионаттарында жеңіске жеткен.
1968 жылы Харальд ақсүйектер әулетінен емес Соня Харальдсенге үйленді. Өз заманында бұл неке корольдік отбасы дәстүрлерінен айтарлықтай алшақтау болып қабылданды. Ерлі-зайыптының екі баласы бар - ханшайым Марта Луиза және ханзада Хокон.