Алматы РФММ-дегі жаппай улану: оқушылар қашықтан оқытуға көшірілді
Республикалық физика-математика мектебінің (РФММ) Алматыдағы филиалының оқушылары балалардың жедел ішек инфекциясы белгілерімен ауруханаға жатқызылуына байланысты уақытша қашықтан оқыту форматына көшті, деп хабарлайды Tengrinews.kz тілшісі.
Мектеп әкімшілігінің мәліметінше, қауіпсіздік мақсатында 14-16 қазан аралығында оқу сабақтары онлайн форматта өтеді.
"Интернатта қалған оқушылар ата-аналарына немесе жақын туыстарына тапсырылады", - деп мәлімдеді мектеп.
РФММ өкілдері санитарлық-эпидемиологиялық қызмет мамандары мектеп пен интернатқа тексеру жүргізіп, зертханалық зерттеулер үшін сынамалар алғанын атап өтті. Ғимараттарда дезинфекция жұмыстары жүргізілді.
"Интернат пен асхананың жұмысы уақытша тоқтатылды. Жағдай мектеп әкімшілігі мен тиісті мемлекеттік органдардың бақылауында", - деп хабарлады мектеп.
Еске сала кетейік, бұған дейін Алматыдағы РФММ-нің 50-ге жуық оқушысы жедел ішек инфекциясы белгілерімен ауруханаға түскенің хабарланды.
14 қазандағы жағдай бойынша 48 оқушы ауруханаға жатқызылды. Олар қалалық балалар жұқпалы аурулар ауруханасында стационарлық ем алып жатыр. Тағы 6 оқушы интернаттың медициналық изоляторына орналастырылып, дәрігерлердің бақылауында отыр.
Қазіргі уақытта оқиғаның себептері анықталып жатыр.