Қарағандыда велосипед ұрлығының ерекше схемасы әшкереленді
Қарағандыда бірқатар велосипед ұрлығына қатысы бар деген күдікпен ер адам мен әйел ұсталды. Полицияның болжамы бойынша, олар велосипед мінген жұптың әрекеті басқалардың күдігін тудырмайды деп есептеген. Бұл туралы Polisia.kz сайтына сілтеме жасап Tengrinews.kz хабарлайды.
Полицияның мәліметінше, бес күн ішінде үш қала тұрғыны зардап шеккен. Жалпы шығын көлемі 300 мың теңгеден асты.
Арыз түскеннен кейін жедел уәкілдер іздестіру шараларын жүргізіп, күдіктілерді - 33 және 29 жастағы жергілікті тұрғындарды ұстады.
Полицейлердің пайымдауынша, ер адам мен әйел назар аудартпас үшін бірге әрекет еткен. Оларға қатысты сотқа дейінгі тергеу басталды. Ұсталғандардың екеуі де уақытша ұстау изоляторына қамалды.
Қазіргі уақытта полицейлер олардың қаладағы осыған ұқсас басқа да ұрлықтарға қатысы бар-жоғын тексеріп жатыр.
Полиция тұрғындарды велосипедтерді, самокаттар мен балалар арбаларын подъездерде және дүкендердің жанында қараусыз қалдырмауға шақырды. Сондай-ақ сенімді ұрлыққа қарсы құлыптарды пайдалану және тек бейнебақылау камераларына ғана сеніп қалмау ұсынылады.
Еске сала кетейік, бұған дейін Қостанайда бір күннің ішінде екі көлік ұрланған - алдымен ГАЗ, содан кейін Audi. Полиция үш күдіктіні анықтады.