Тараздық жалғызбасты ана өзін банкрот деп тануға қол жеткізді

Таразда сот жеті несие берушіге 7,4 миллион теңгеден аса қарыз болған әйелді банкрот деп таныды. Ол бір жылдан аса уақыт бойы берешегін өтей алмаған, ал қарызды реттеу әрекеттері нәтиже бермеді, деп хабарлайды Tengrinews.kz тілшісі.

Соттың мәліметінше, әйел 2004 жылдан бері ажырасқан және үш кәмелетке толмаған баланы тәрбиелеп отыр. Отбасы жалдамалы пәтерде тұрады, ал кенже баласы туа біткен дертіне байланысты тұрақты күтім мен емдеуді қажет етеді.

Әйел неге банкрот деп танылды?

Қаржы басқарушысының қорытындысы мен түгендеу актісіне сәйкес, әйелдің қарызын өтеу үшін сатуға болатын мүлкі жоқ. Оның атына жылжымайтын мүлік, автокөлік және басқа да құнды активтер тіркелмеген.

Бұдан бөлек, қазақстандық әйел ресми түрде жұмыссыз ретінде есепте тұр. Сот оның несие берушілер алдындағы міндеттемелерін орындай алмайтынын анықтады.

Нәтижесінде сот арқылы банкроттық рәсімін қолдану туралы өтініш қанағаттандырылды.

Банкроттық кезінде қандай шектеулер қолданылады?

Рәсім барысында қаржы басқарушысына борышкердің мүлкін басқаруға алу, тыйымдар мен инкассолық өкімдерді алып тастау, сондай-ақ несие берушілермен есеп айырысу үшін арнайы шот ашу тапсырылды.

Сонымен қатар әйелге жаңа ақшалай міндеттемелер алуға және Қазақстан аумағынан шығуға тыйым салынады.

Сот шешімі заңды күшіне енді.

Банкроттық қалай жұмыс істейді және қарызы жиналып қалған қазақстандықтар не істеуі керек

Еске сала кетейік, Қазақстанда қарызын өтей алмайтын азаматтар үшін бірнеше рәсім қарастырылған: соттан тыс және сот арқылы банкроттық, сондай-ақ төлем қабілеттілігін қалпына келтіру. Олардың әрқайсысының өз шарттары мен салдары бар. Мәселен, банкроттықтан кейін бес жыл бойы жаңа несие алуға болмайды, ал рәсімге қайта жүгінуге тек жеті жылдан кейін ғана рұқсат етіледі. Кімдер өзін банкрот деп жариялай алатыны, мұны қалай жасау керектігі және заңда қандай шектеулер қарастырылғаны туралы толығырақ Tengrinews.kz материалынан оқыңыздар.