Тұрғын үй сатып алғаннан кейін коммуналдық қарыз қалса, кім төлеуі керек?
Жылжымайтын мүлік сатып алдыңыз ба, бірақ түбіртекте бұрынғы иесінің қарызы қалып қойды ма? Сатып алу фактісі жаңа иесін коммуналдық қызметтер бойынша борышкер етпейді. Ұлттық экономика министрлігі Tengri Home тілшісіне шартты қалай қайта рәсімдеуге, есептеулерді бөлуге болатынын және жеткізуші бұдан бас тартқан жағдайда не істеу керектігін айтып берді.
Коммуналдық қызметтер үшін ескі қарыз тұрғын үйдің жаңа иесіне ауыспайды
Тұрғын үйді сатып алу фактісінің өзі жаңа иесі сатушының қарыздарын өтеуге міндетті дегенді білдірмейді. Бірақ сатып алушы мен бұрынғы иесі сатып алу-сату шартын тексергені жөн: онда берешекті кім төлейтіні бөлек көрсетілуі мүмкін. Сонымен қатар қарызды басқа адамға аудару үшін сол энергия беруші компанияның келісімі қажет. Егер тараптар өзара келісе алмаса, дауды сот арқылы шешуге болады.
Коммуналдық компания тұтынушыларға тең қолжетімділікті қамтамасыз етуге және қызметке қатысы жоқ қосымша талаптар қоймауға міндетті. Сондықтан бұрынғы иесінің жаңа меншік иесі төлеуге міндетті емес берешегі шартты қайта рәсімдеуге, дербес шоттағы деректерді өзгертуге немесе қызмет алуға кедергі болмауы тиіс.
Егер компания бас тартса, жазбаша негіздеме талап ету керек. Негізсіз бас тарту жағдайында Табиғи монополияларды реттеу комитетінің аумақтық департаментіне жүгінуге болады.
Жылжымайтын мүлікті сату: коммуналдық қызметтер үшін дербес шотты және есептегіштерді қалай қайта рәсімдеу керек?
Жаңа иесі коммуналдық компанияға хабарласып, жеке куәлігі мен меншік құқығы туралы құжатты көрсетуі қажет. Министрлік егер бар болса, есептегіш көрсеткіштері жазылған пәтерді қабылдау-тапсыру актісін, түбіртектер мен төлем растамаларын қоса беруге кеңес береді.
Егер тұрғын үйді өткізу кезінде есептегіш көрсеткіштері тіркелмесе, жеткізушіден ағымдағы көрсеткіштерді алуды және алдыңғы көрсеткіштерді, есептеулер мен төлем туралы мәліметтерді ұсынуды сұрауға болады. Осы деректер бойынша төлемдерді бұрынғы және жаңа иелері арасында бөлуге болады. Егер есептеулер бойынша келісімге келу мүмкін болмаса, дау сот тәртібімен шешіледі.
Бұрынғы иесінің коммуналдық қарызы түбіртекке енгізілсе, не істеу керек?
Компанияға жазбаша шағым жолдау қажет: пәтердің сатып алынған күнін көрсетіп, есептеулерді кезеңдерге бөлуді, ал бұрынғы иесінің қарызын жаңа меншік иесіне ұсынылған сомадан алып тастауды сұрау керек. Шағымға меншік құқығы туралы құжатты, қарызы бар түбіртекті, қабылдау-тапсыру актісін және төлем құжаттарын (бар болса) қоса берген дұрыс.
Шағымды жеке тапсыруға, хабарламасы бар тапсырыс хат арқылы немесе жеткізуші бұрын көрсеткен болса, электрондық поштасына жіберуге болады. Жеке тапсырған кезде өз данаңызға қабылданғаны туралы белгі қойдырып алу керек. Егер жеткізуші талаптармен келіспесе, ол 10 күнтізбелік күн ішінде дәлелді жазбаша жауап беріп, растаушы құжаттарды қоса беруі тиіс.
Бұрынғы иесінің қарызы үшін коммуналдық қызмет өшірілсе, не істеу керек?
Егер қызмет пәтер сатылғанға дейін бұрынғы иесінің қарызы үшін өшірілген болса, жаңа иесі шарт жасасу және қызметті қайта қосу үшін коммуналдық компанияға жүгіне алады. Қайта қосу құны мен тәртібі қызмет түріне және өшіру мән-жайларына байланысты. Егер коммуналдық компания төлем талап етсе, жазбаша негіздеме мен есептеуді сұрату қажет. Сондай-ақ Табиғи монополияларды реттеу комитетінің аумақтық департаментіне жүгінуге болады.
Пәтер сатып алар алдында министрлік берешекті тексеруге және коммуналдық қызметтердің көрсетілуін анықтауға кеңес береді. Егер қарыз болса немесе қызметтер өшірілсе, сатып алу-сату шартында берешекті және қайта қосуды кім және қалай төлейтінін бөлек көрсеткен абзал.
Жарық та жоқ, су да жоқ: Қазақстанда жаңа тұрғын үйлер неге коммуналдық мәселелерге тап болады?