Зәйдә имин булмаган 36 гаилә депутатлар күзәтүенә беркетелде
Татарстан Президенты Рөстәм Миңнеханов, ТР Хезмәт, халыкны эш белән тәэмин итү һәм социаль яклау министрлыгының кече коллегия утырышында имин булмаган гаиләләргә дәүләт органнары, оешма-предприятие җитәкчеләрен, депутатларны җәмәгать тәрбиячеләре итеп беркетү һәм аларга аерым йөкләмәләр бирү турында катгый таләпләр куйган иде. Бу имин булмаган гаиләләрнең фатир, коммуналь хезмәтләр өчен бурычлары күпләп җыелу, шуның нәтиҗәсендә әлеге гаиләләрнең ут, газлары өзелү, ә аларда тәрбияләнүче балигъ булмаган балаларның авыр тормыш шартларында калу проблемасы, авыр тормыш хәлендәге гаиләләргә башка төрле проблемаларын хәл итүдә ярдәм итүне конкрет оештыру белән бәйле.
Безнең районда тәртип, закон бозып, махсус профилактик исәпкә алынган яшүсмерләрне җәмәгать тәрбиячеләренә беркетү, аларның буш вакытларын файдалы үткәрүне контрольдә тоту буенча җитди эшләү тәҗрибәсе инде шактый вакыт кулланыла. Хәзер исә район җитәкчелеге карары белән, имин булмаган гаиләләрне дә аерым кешеләргә беркетеп, кирәкле чаралар күрү алгы планга куелды. Бу көннәрдә шәһәр һәм район Советы депутатлары профилактика субъектлары белән берлектә имин булмаган гаиләләрдә булып аларның көнкүрешен, нинди проблемалар алдында калуларын, аларны чишү өчен нинди юллар булуын ачыклыйлар. Соңыннан кайсы гаиләгә нинди ярдәм күрсәтү мөһимлеге хәл ителәчәк.
- Район башлыгы карары белән агымдагы елның 15 февраленнән ведомствоара исәптә торучы, яшүсмер балалары булган, имин булмаган, социаль авыр хәлдәге 36 гаилә шәһәр һәм район советы депутатларының даими күзәтүенә беркетелде. Хәзер без аларның социаль яшәү рәвеше дәрәҗәсен күтәрү максатында нинди эшләр башкару мөмкинлекләрен барлау өчен гаиләләргә йөрибез. Кемнедер эшкә урнаштырырга ярдәм кирәк булса, кемгәдер документларын тәртипкә китереп, социаль ярдәмнән файдалану мөмкинлеге тудыру, төрле проблемаларын чишү өчен теге яки бу җитәкчегә кабул итүгә керүне оештыру, шулай ук ди булышлык күрсәтүләр күздә тотыла. Мәсәлән, депутат Зәбирә Бариева үзенә беркетелгән гаиләдә булып, ана кешене мәктәпкә эшкә урнаштыру мәсьәләсен хәл итәргә алынды. Башка депутатларыбыз да гаиләләргә ничек ярдәм итә алу мөмкинлеген өйрәнә. Шәхсән үзем Иске Зәй бистәсендәге гаиләләр белән эшлим. Соңрак без үзебез күргән, белгәннәрдән чыгып - һәр гаилә буенча аерым карарлар кабул итәчәкбез, - ди шәһәр Советы рәисе урынбасары Елена Недошивина.