Бүгенге буын, өлкән буынга рәхмәтле
Традицион төстә Җиңү бәйрәменә багышланган чаралар бүген Зәйдә яшь буынның өлкән буынга ныклы алмашчылар булып үсүен дәлилләү мәгънәсендә җиңел атлетика эстафетасы белән башланып китте. Иң башта шәһәр мәктәпләренең югары сыйныф укучылары көч сынашты. Укучылар ярышта җиңүгә омтылулары белән бабаларыбыз кебек көчле рухлы, кирәксә ил иминлеген якларга әзер булуларын күрсәттеләр.
Хакимият бинасы каршындагы мәйданда мөхтәрәм сугыш һәм тыл ветераннарын музыка мәктәбендә шөгыльләнүче талантлы балалардан тупланган тынлы оркестр каршы алды. Дәһшәтле еллар композицияләрен башкаручы оркестр өлкән буынның гына түгел, яшьләрнең дә күңел хисләрен кузгатып, шанлы еллар кайтавазын чагылдырды. Волонтерлар исә мәйданга килгән һәр ветеранны ачык йөз белән каршы алып, аларга күкрәк билгеләре кадады, флаглар, истәлекле кул эшләре бүләк итте.
Һәр сугыш, тыл ветеранын район башлыгы Разиф Кәримов, район җитәкчеләре хәл-әһвәл белешеп каршы алды. (фотоларны түбәннән карагыз)