Бәйрәмнәр белән! Хөрмәтле зәйлеләр!
Сезне Халыклар бердәмлеге һәм Татарстан Конституциясе көннәре белән котлыйм!
Әлеге ике бәйрәм безнең күпмилләтле илебез халыкларның бердәмлеген гәүдәләндерә, тупланганлык символы, ватанпәрвәрлек, һәркемнең гражданлык җаваплылыгы үрнәге булып тора. Без – барыбыз да, яшебезгә, нинди диндә булуыбызга, нинди һөнәр башкаруыбызга, кызыксынуларыбыз төрле булуга бәйсез рәвештә, ил язмышы өчен җаваплы булуыбызны тирәнтен аңлаучы халык. Һәркем үзенең иминлеге өчен нык ышанган, хезмәттә һәм иҗатта үз мөмкинлекләрен гамәлгә ашыру мөмкинлеге булган цивилизацияле гражданлык җәмгыятен без бары тик бергәләп кенә төзи алабыз.
Мөстәкыйль, икътисади яктан зур үсеш алган Татарстанның Россия регионнары арасында, ил тарихында аерым урыны һәм 1992 елның 6 ноябрендә кабул ителгән Татарстан Республикасы Конституциясе белән билгеләнгән федератив мөнәсәбәтләр системасында үз роле бар. Бу – республика тарихындагы истәлекле даталар арасында иң әһәмиятлесе. Татарстан Республикасы Конституциясе гражданнар хокуклары һәм ирекләренең ышанычлы нигезе булды һәм шулай булып калачак. Ул җирле үзидарә үсешенең һәм һәр кеше иминлегенең ныклы нигезен тәэмин итә.
Татарстан елдан-ел өлгергән, ныклы адымнар белән алга баручы республика икәнен күсәтеп килә. Бөтен уңайлыклары булган йорт, медицина үзәкләре, авыл мәдәният йортлары, балалар бакчалары, юллар төзелүнең, фән һәм мәгариф үсешенең без – тере шаһитлары. Дәүләтебез Бөек Ватан сугышы һәм хезмәт ветераннарын аеруча нык кайгырта. Болар барысы туган Татарстаныбыз белән горурлану мөмкинлеге бирә, ә барлык матур башлангычларның нигезендә республикабыз законы – Татарстан Республикасы Конституциясе ята.
Кадерле зәйлеләр! Сезнең барыгызга да игелекләр, тынычлык, сәламәтлек, йортларыгызга иминлек телим. Бәйрәмнәр Россия, Татарстан һәм районыбызның тагын да үсеше, алга китеше өчен бергәләп хезмәт итәргә этәрсен.
Разиф Кәримов,
район башкарма комитеты җитәкчесе