Putin Trump-la danışıb, Mahmud Abbasla görüşüb
Rusiya xəbər agentliklərinin yaydığı xəbərlərdə deyilir ki, iki lider, fevralın 12-də, Putinlə Fələstin prezidenti Mahmud Abbas arasında keçirilməli olan görüş ərəfəsində danışıblar.
TASS agentliyinin verdiyi xəbərə görə Putin qapalı keçirilən görüşdən əvvəl Mahmud Abbasa deyib: “Mən elə indicə Amerika prezidenti Trump-la danışdım. Təbiidir ki, biz İsrail-Fələstin münaqişəsi barədə danışırdıq”.
Putin bildirib ki, müzakirələr əsas etibarilə İsrail və fələstinlilər arasında fikir ayrılıqlarının aradan qaldırılması yolları üzərində cəmləşmişdi. Rusiya prezidenti deyib ki, hazırda regionda yaranmış vəziyyət Kremlin arzu etdiyi şəkildə deyil.
Rusiya xəbər agentlikləri bildirirlər ki, Abbas, fələstinlilərin İsraillə danışıqlarda Birləşmiş Ştatları yeganə vasitəçi kimi qəbul etmədiklərini deyib.
ABŞ və Fələstin hakimiyyəti arasında münasibətlər, dekabrın 6-da Donald Trump Yerusəlimi İsrailin paytaxtı kimi tanıdığını bəyan edəndən bəri pisləşib.
Fələstinlilər Şərqi Yerusəlimi öz gələcək dövlətlərinin paytaxtı kimi görürlər. İsrail Şərqi Yerusəlimi işğal etdikdən sonra şəhəri bütövlükdə öz paytaxtı elan edib, lakin beynəlxalq icma bu aktı heç vaxt dəstəkləməyib.
İndi belə görünür ki, Mahmud Abbas yaranmış vəziyyətdə öz mövqeyini Rusiyanın dəstəyi hesabına möhkəmləndirmək istəyir.
Abbasın Moskvaya səfərindən iki həftə əvvəl İsrail baş naziri Benjamin Netanyahu Kremlin qonağı olmuşdu.
İlkin razılaşmaya əsasən Abbas Putinlə Qara dəniz sahilindəki Soçidə görüşməli idi, lakin Rusiya prezidenti fevralın 11-də Moskva yaxınlığında 71 nəfərin ölümü ilə nəticələnmiş təyyarə qəzasının ardınca paytaxtı tərk edə bilməyib.
Trump bu qəza ilə əlaqədar Putinə başsağlığı verib.