Şimali Koreya daha bir raket atıb, Seul narahatdır
Şimali Koreya bazar günü Şərq dənizinə doğru naməlum raket atıb.
Bu barədə "Yonhap" xəbər agentliyi Cənubi Koreyanın Birləşmiş Qərargah Rəislərinə istinadən məlumat yayıb.
Hərbi ekspertlərin fikrincə, Şimali Koreyanın atdığı raket ballistik raket olub.
Yaponiyanın "Kyodo" agentliyi hərbi mənbələrə istinadən xəbər verir ki, Yaponiya Nazirlər Kabinetinin baş katibi Hirokazu Matsuno deyib ki, sözügedən raket 2000 km yüksəklikdə 800 km uçduqdan sonra Yaponiyanın müstəsna iqtisadi zonasından kənara düşüb.
Cənubi Koreya prezidenti Mun Çje İn milli təhlükəsizlik şurasının fövqəladə iclasını çağıraraq, Şimali Koreyanın “qitələrarası ballistik raketləri buraxmamaq öhdəliyindən imtina etmək istiqamətində addım atdığını” deyib.
“Şimali Koreya indiyədək nüvə sınaqlarına və qitələrarası ballistik raket (ICBM-intercontinental ballistic missile) buraxılmasına moratorium tətbiq edərək dialoqa hazır olduğunu bildirib. Lakin o, orta mənzilli ballistik raket atıbsa, onların moratoriumun ləğvinə yaxın olduğunu güman edə bilərik”, - Cənubi Koreya mediası Mun Çje İn-dən sitat gətirir.
Cənubi Koreya prezidentinin sözlərinə görə, hazırkı raket buraxılışı “Koreya yarımadasının nüvəsizləşdirilməsinə, Koreya yarımadasında sülhə və sabitliyə və beynəlxalq ictimaiyyətin diplomatik səylərinə meydan oxumaq, habelə BMT Təhlükəsizlik Şurasınin qətnamələrini pozmaq aktıdır”.
O, Şimali Koreyanı gərginlik yaratmağı dayandırmağa və beynəlxalq dialoq çağırışlarına cavab verməyə çağırıb.
Bu, 2022-ci il başlayandan bəri Şimali Koreyanın atdığı sayca yeddincisi raketdir.
Rusiyanın “İnterfaks” xəbər agentliyinin məlumatına görə, ABŞ silahlı qüvvələrinin Hind-Sakit Okean Komandanlığı bazar günü buraxılışından sonra bildirib ki, bazar günü atılan raket ona və müttəfiqlərinə təhlükə yaratmasa da, Vaşinqton “bu hərəkətləri pisləyir və sabitliyi pozan addımlardan çəkinməyə” çağırır.
Rusiyanın Şimali Koreya ilə yeganə həmsərhəd bölgəsi olan Primorsk diyarından verilən xəbərə görə isə raketin atılmasından sonra radiasiya fonunda hər hansı dəyişiklik müşahidə olunmayıb.
2018-ci ildə Şimali Koreya lideri Kim Çen In ABŞ prezidenti Donald Trampla ilk görüşündə ICBM atışlarından və nüvə sınaqlarından imtina edəcəyinə söz verib.
Yanvarda KXDR nüvə silahı və uzaqmənzilli raketlərin sınaqlarının mümkün bərpasını elan edib.
Xarici media diqqəti Pxenyanın regional hərbi fəaliyyətinin intensivləşməsinin Çinin Qış Olimpiya Oyunlarına son hazırlıqlarla üst-üstə düşməsinə yönəldir.
Çin Şimali Koreyanın yeganə müttəfiqidir. Bu arada Cənubi Koreyada mart ayında keçiriləcək prezident seçkilərinə hazırlıqlar gedir.