Супраць лома
Калісьці ў маім савецкім дзяцінстве вельмі папулярнай была прымаўка: "Супраць лома няма прыёму". На якую звычайна адказвалі: "Калі няма іншага лома". Цяжка сказаць, адкуль яна ўзьнікла, пэўна з асяродку гарадзкой шпаны, але сутнасьць справы абедзьве часткі народнай мудрасьці перадавалі дакладна.
У сувязі з усеагульным шумам, узьнятым беларускай паспалітай інтэрнэт-супольнасьцю з нагоды Указу №60, асабліва ў той яго частцы, дзе гаворыцца пра фільтрацыю інтэрнэт-сайтаў, падобная старая мудрасьць робіцца як ніколі актуальнай. Праўда, чаканага татальнага блякаваньня зь 1 верасьня не адбылося. Але, як кажа народная мудрасьць, "хто папярэджаны, той узброены", – лепш мець лом за пазухай.
А ламоў супраць цэнзараў у Сеціве на сёньня хапае. Не забывайма, што інтэрнэт першапачаткова ствараўся на замову вайскоўцаў як "незабівальная" кампутаровая сетка на выпадак ядзернай вайны. Так што пакуль ёсьць хоць нейкае выйсьце ў яе, заблякаваць непажаданую інфармацыю немагчыма.
Я ня стану тлуміць чытачам галаву рознымі складанымі спосабамі абыходжаньня фільтраў накшталт выкарыстаньня ананімных ці проста адкрытых проксі-сэрвэраў ці віртуальных абароненых каналаў. Дастаткова прыгадаць некалькі самых даступных.
Па-першае, вядомы праект torproject.org. Відэа інструкцыі можна паглядзець ТУТ і ТУТ.
Tor, праўда, часам працуе вельмі павольна, бо шмат хто з карыстальнікаў у вольным сьвеце ўжывае яго для спампоўваньня кантэнту, які забаронены з прычыны парушэньня аўтарскіх правоў ці ўтрыманьня, скажам, дзіцячай парнаграфіі. Але кіраўнікі праекту Tor змагаюцца з гэтым, і паступова сытуацыя паляпшаецца.
Апроч таго, і хутчэй найперш, існуе такая цудоўная канадзкая кампанія як Psiphon, што на замову розных мэдыйных арганізацыяў аказвае паслугі па "прабіваньні" інфармацыйнай блякады ў несвабодных краінах. У прыватнасьці, для Радыё Свабода яна адмыслова стварыла адрас svaboda2.net, празь які можна глядзець наш сайт скрозь фільтры. Дарэчы, глядзець можна ня толькі наш сайт, але й іншыя блякаваныя сайты. Адказваючы на пытаньне, якое мне ўжо часта задавалі, а што калі заблякуюць і гэты адрас, магу толькі перадаць словы спэцыялістаў кампаніі, якія сьцьвярджаюць, што зрабіць гэта немагчыма. Прыклад – пасьпяховае дзеяньне падобнага проксі ў Іране, дзе тамтэйшыя цэнзары лібэралізмам ніяк не вызначаюцца.
Так што гэта той выпадак, калі на лом знайшоўся калі ня іншы лом, то добры прыём.