Інфляцыя за чатыры месяцы 2019 года склала 2,7%
Спажывецкія цэны ў красавіку 2019 года ў параўнанні з сакавіком выраслі на 0,04%, да снежня 2018 года — на 2,7%, паведаміў Нацыянальны статыстычны камітэт.
Для параўнання: у красавіку да сакавіка 2018 года спажывецкія цэны павялічыліся на 0,3%, да снежня 2017-га — на 2,9%.
У красавіку 2019 года ў адносінах да сакавіка цэны на харчовыя тавары выраслі на 0,2% (з пачатку года — на 3%), на нехарчовыя — на 0,1% (на 1,7%), на паслугі — знізіліся на 0,2% (выраслі на 3,3%).
Згодна з прагнозам Нацбанка, у 2019 годзе інфляцыя не перавысіць 5%, а паводле ацэнак Еўразійскага банка развіцця, яна складзе 5,7%. „На паскарэнне тэмпаў росту спажывецкіх цэн паўплывае павышэнне інфляцыі ў Расеі, паступовае аслабленне беларускага рубля, а таксама захаванне інфляцыйнага націску з боку заработнай платы”, — лічаць эканамісты ЕАБР.
Згодна з іх ацэнкамі, уплыў гэтых фактараў на адхіленне інфляцыі ад мэты будзе часовым, і тэмпы росту спажывецкіх цэн у сярэднетэрміновы перыяд паступова замарудзяцца да мэтавага ўзроўню.
Нацбанку ўдасца дасягнуць у бягучым годзе мэты па інфляцыі, гаворыцца ў прагнозе Даследчага цэнтра ІПМ, прэзентацыя якога адбылася 24 красавіка ў Менску.
У першым квартале рост інфляцыі быў часовым і звязаны з сезонным павелічэннем цэн на адміністрацыйна рэгуляваныя тавары, лічаць эксперты. „Пік гадавой інфляцыі, падобна, пройдзены ў лютым. Умацаванне валютнага курсу, зніжэнне інфляцыйных чаканняў, зніжэнне інфляцыі ў Расеі, нейтральная манетарная палітыка, адсутнасць шокаў з боку росту даходаў насельніцтва, адсутнасць значных знешніх шокаў — усё гэта кажа на карысць спрыяльнага прагнозу па інфляцыі ў сапраўдны момант”, — гаворыцца ў прагнозе.
Эканамічныя ўлады, чакаюць аўтары даследавання, будуць у 2019 годзе праводзіць кансерватыўную палітыку, каб утрымаць інфляцыю ў запланаваных межах.
„Міністэрства фінансаў будзе праводзіць кансерватыўную бюджэтна-падатковую палітыку, паколькі аб’ём рэсурсаў, якія мае дзяржава, абмежаваны. Нацыянальны банк будзе праводзіць кансерватыўную грашова-крэдытную палітыку, каб утрымаць інфляцыю ў 2019 годзе ў межах 5%”, — заявіў дырэктар Даследчага цэнтра ІПМ Аляксандр Чубрык на прэзентацыі прагнозу.
belapan.by