Аляксей Канстанцінаў: Дзеці з інваліднасцю маюць вялікія праблемы з адукацыяй
20 лістапада адзначаецца 30-годдзе Канвенцыі аб правах дзіцяці. У Беларусі яна ўступіла ў сілу ў 1990 годзе. Але ў некаторых момантах яна не выконваецца: а менавіта ў дачыненні да дзяцей з інваліднасцю і іх магчымасці атрымоўваць адукацыю.
Так, згодна з пастановай №128 Міністэрства аховы здароўя, існуе пералік паказанняў і проціпаказанняў, на падставе чаго псіхолага-медыка-педагагічная камісія (ПМПК) вырашае адукацыйны маршрут для дзіцяці з інваліднасцю. Праблема ў тым, што гэты маршрут ніколі не распрацоўваецца індывідуальна.
Кажа Аляксей Канстанцінаў, прадстаўнік цэнтру праблем дзіцячага развіцця “Леванія”:
– Камісія выдаткоўвае на дзіця 10-20 хвілін і гавораць: калі ў вас такі дыягназ, то вам трэба або так, або так. І гэта ў лепшымі выпадку, калі яны нешта прапаноўваюць выбраць бацькам. Звычайна яны ставяць перад фактам – вам туды. Не згаджаецеся – вам горш будзе. Гэтае дзіцё, як нейкі суб’ект, яно губляецца. І ў нас фактычна адукацыйная сістэма глядзіць на дзіця як на нейкае цела з дэфектамі.
А гэта дыскрымінацыя і парушэнне нормаў Канвенцыі, адзначае Аляксей Канстанцінаў. Акрамя гэтага існуе яшчэ дзве вялікія праблемы. Першая — гэта адсутнасць фінансавання, каб аплаціць педагогам павышэнне кваліфікацыі ў дачыненні да працы з дзецьмі з асаблівасцямі. А другая — гэта адсутнасць саміх адукацыйных методык для такіх педагогаў.
– Дзяржава не зацікаўлена ў ніякай матывацыі і стымуляцыі тых спецыялістаў, якія працуюць з дзецьмі, якія маюць асаблівасці развіцця. І далей мы атрымлівае па ланцугу спецыялістаў, якія кепска працуюць, якія выводзяць дзяцей не на максімальна магчымы для іх узровень, а бяруць па ніжняй планцы іх магчымасці, гэта ў лепшым выпадку, калі дзіцёнку ўдаецца прабіцца праз усе гэтыя перашкоды.
Усё гэта з’яўляецца цэлым наборам бар’ераў. І на гэта цэнтр “Леванія” звяртаў увагу ў альтэрнатыўнай справаздачы па таму, як імплементуюцца нормы Канвенцыі аб правах дзіцяці ў Беларусі.
Кася Манюк, Беларускае Радыё Рацыя
Фота з ФБ Аляксея Канстанцінава