Адмяняюцца два прамыя цягнікі з Менска ў Варшаву і Прагу
Пасля 8 снежня трапіць у Варшаву з Менска можна будзе, як і раней, на транзітных цягніках.
У пачатку снежня праз Беларусь перастануць курсаваць два міжнародныя цягнікі: пасля 8 снежня адмяняецца цягнік Масква — Варшава, пасля 10 снежня — Масква — Прага.
„Цягнікі 009Щ і 021Е спыняць сваё курсаванне пасля змены раскладу руху 8 снежня”, — расказалі Еўрарадыё ў БЧ. Пад скарачэнне трапілі прамыя цягнікі, якія курсуюць паміж сталіцамі, — 009Щ „Паланэз” і 021Е „Влтава”.
Пасля 8 снежня трапіць у Варшаву з Менска можна будзе, як і раней, на транзітных цягніках. Іх застаецца тры: 023Й Масква — Парыж, 013М Масква — Берлін і 017Б Масква — Ніца. Цэны на білеты ад 182 да 1694 рублёў.
Таксама застаецца перасадачны маршрут праз Берасце. Спярша на электрычцы бізнес-класа да Берасця, а там перасаджваешся на цягнік да Варшавы. Цана такога маршруту складзе ад 45 да 80 рублёў.
А вось у Прагу на прамым цягніку, падобна, больш не трапіць. Апошні цягнік да Прагі адправіцца з Менска 10 снежня. Кошт білета ад 400 да 730 рублёў. Пасля застануцца толькі прычапныя вагоны.
Авіяпералёты застаюцца без змен. З Менска ў Варшаву кошт пералёту ад 150 рублёў без багажу і ад 190 рублёў з багажом у адзін бок. У Прагу ад 250 рублёў без багажу і ад 310 рублёў з багажом у адзін бок.