Рыхтуецца кангрэс за незалежнасць Беларусі
Пра гэта паведаміла Алена Анісім на пасяджэнні прадстаўнікоў апазіцыі і дэмакратычнай грамадскасці.
Савет кангрэса за незалежнасць Беларусі правядзе пасяджэнне для падрыхтоўкі чарговай сесіі форуму, паведаміла экс-дэпутат Палаты прадстаўнікоў Алена Анісім 11 снежня ў Менску на пасяджэнні прадстаўнікоў апазіцыі і дэмакратычнай грамадскасці, прысвечаным кампаніі ў падтрымку незалежнасці.
У каментары БелаПАН Анісім сказала, што пасяджэнне савета прызначанае 13 снежня ў Менску.
„Мы збіраем савет кангрэса за незалежнасць. І будзем думаць пра тое, каб правесці сесію кангрэса аб наяўным стане краіны: што павінна зрабіць інтэлігенцыя, што павінен рабіць кожны грамадзянін у выпадку, калі ўзнікла рэальная пагроза страты незалежнасці”, — паведаміла яна.
Першая сесія кангрэса за незалежнасць Беларусі прайшла 21 снежня 2014 года. У ёй узялі ўдзел прыблізна 100 прадстаўнікоў Таварыства беларускай мовы імя Францішка Скарыны (ТБМ), Рады беларускай інтэлігенцыі, Партыі БНФ, Аб’яднанай грамадзянскай партыі, Беларускай сацыял-дэмакратычнай партыі (Грамада) і некаторых іншых арганізацый. Быў прыняты маніфест у падтрымку незалежнасці. У ім, у прыватнасці, падкрэслівалася, што дамова аб стварэнні Еўразійскага эканамічнага саюза нясе новую пагрозу незалежнасці Беларусі, бо шэраг яе палажэнняў супярэчаць агульнапрызнаным нормам міжнароднага права, Дэкларацыі аб дзяржаўным суверэнітэце і Канстытуцыі Рэспублікі Беларусь.
Другая сесія кангрэса за незалежнасць Беларусі адбылася 7 чэрвеня 2015 года ў Менску пры ўдзеле прыкладна 30 прадстаўнікоў палітычных сілаў і грамадскіх рухаў. Грамадска-палітычны форум быў ініцыяваны ТБМ і Радай беларускай інтэлігенцыі. У мерапрыемстве ўзялі ўдзел актывісты Партыі БНФ, стваранага руху „За дзяржаўнасць і незалежнасць Беларусі”, Беларускай сацыял-дэмакратычнай партыі (Грамада), Ліберальна-дэмакратычнай партыі Беларусі, Аб’яднанай грамадзянскай партыі. Удзельнікі форуму абмеркавалі палітычную сітуацыю ў свеце і Беларусі, у тым ліку наступныя прэзідэнцкія выбары.