Падпісанне канкардату паміж Беларуссю і Ватыканам пакуль не прадбачыцца
«Нічога няма і няма ніякіх зрухаў», – сказаў наконт падпісання афіцыйнага пагаднення паміж Менскам і Святым прастолам на сустрэчы з журналістамі ў Менску мітрапаліт Мінска-Магілёўскі арцыбіскуп Тадэвуш Кандрусевіч.
Улічваючы, што справа з міжнародным пагадненнем не рухаецца, Рыма-каталіцкі касцёл у Беларусі падрыхтаваў іншы дакумент. «Дзяржаўныя структуры вельмі зацікаўленыя ў нашым досведзе дабрачыннасці і супрацы з Касцёлам», – зазначыў арцыбіскуп.
– Мы таксама падрыхтавалі праект дамовы паміж Канферэнцыяй біскупаў і дзяржавай. Мы бачым, што нічога не ідзе наперад адносна дамовы паміж Беларуссю і Ватыканам. Аднак нам было сказана, што няма палітычнай волі ў прыняцці гэтага дакумента. Што мы можам далей сказаць? На жаль, гэта так. Якасць гэтага дакумента была б не такая самая як паміж Ватыканам і Беларуссю, аднак ён таксама даў бы нам нейкія магчымасці.
Паводле мітрапаліта, прадстаўнікі дзяржавы звяртаюцца да касцёла па дапамогу, але атрымоўваецца, што ўся супраца зараз адбываецца па-за межамі афіцыйных дакументаў.
– Проста просяць сацыяльныя службы, дзяржаўныя, дапамажыце нам. І ёсць ужо шмат дзяржаўных арганізацый, у тым ліку і міністэрстваў, якія звяртаюцца да нас: мы хочам падпісаць з вамі дамову. Але ў нас няма падпісанай іншай. Спачатку павінна быць агульная, а потым ідуць гэтыя дамовы. Я думаю, што гэтыя ініцыятывы некаторых дзяржаўных органаў могуць дапамагчы ў падпісанні нейкага дакумента. Проста гэтыя міністэрствы адчуваюць, што патрэбна больш шчыльнае супрацоўніцтва.
Візіт Папы Рымскага ў Беларусь – гэтае пытанне задаюць Тадэвушу Кандрусевічу штогод – не адбудзецца і ў 2020-м. «Молімся за гэта», – сказаў іерарх Касцёлу.
Беларускае Радыё Рацыя