Лукашэнка падпісаў указ аб дадатковых мерах сацабароны ваеннаслужачых
Указ накіраваны на падвышэнне сацыяльнай абароны асоб, прызваных на тэрміновую ваенную службу, службу ў рэзерве.
Аляксандр Лукашэнка 10 лютага падпісаў указ нумар 48 „Аб павышэнні ўзроўню сацыяльнай абароны грамадзян у сувязі з прызывам на тэрміновую ваенную службу, службу ў рэзерве”. Пра гэта БЕЛТА паведамілі ў прэс-службе кіраўніка дзяржавы.
У адпаведнасці з дакументам устанаўліваецца, што з 1 студзеня 2020 года ваеннаслужачыя, якія праходзяць тэрміновую ваенную службу, падлягаюць абавязковаму дзяржаўнаму сацыяльнаму страхаванню на выпадак дасягнення пенсійнага ўзросту, інваліднасці і страты карміцеля. Указам вызначаецца парадак выплаты абавязковых страхавых узносаў за перыяды тэрміновай ваеннай службы, што дазволіць залічваць такія перыяды ў страхавы стаж, неабходны для вызначэння права на працоўную пенсію.
Для грамадзян, якія прайшлі тэрміновую ваенную службу, службу ў рэзерве, прадугледжаны дадатковыя льготы для падрыхтоўкі да паступлення ў навучальныя ўстановы, а таксама пераважнае права выбару месца работы па спецыяльнасці пры размеркаванні пасля завяршэння атрымання адукацыі. Такім грамадзянам у год звальнення або ў год, што ідзе за годам звальнення, пры наяўнасці сярэдняга бала ў дакуменце аб адукацыі не ніжэйшага за 6 балаў і па рэкамендацыі воінскіх часцей прадастаўлена права на навучанне на факультэтах давузаўскай падрыхтоўкі, падрыхтоўчых аддзяленнях, падрыхтоўчых курсах у дзяржаўных установах сярэдняй спецыяльнай і вышэйшай адукацыі за кошт сродкаў рэспубліканскага і (або) мясцовых бюджэтаў.
Акрамя таго, уведзена норма аб захаванні права карыстання жылым памяшканнем дзяржаўнага жыллёвага фонду ў інтэрнатах членамі сям’і ваеннаслужачага на ўвесь перыяд тэрміновай ваеннай службы.
Прыняцце гэтага ўказа дасць магчымасць павысіць сацыяльную абарону асоб, прызваных на тэрміновую ваенную службу, службу ў рэзерве.