У Беларусі скарацілася дапамога на пахаванне
Дапамогу на пахаванне прызначаюць, калі па яе звярнуліся не пазней за шэсць месяцаў з дня смерці.
У Беларусі з 1 сакавіка скарацілася дапамога на пахаванне – да 1118,1 рубля, гаворыцца на сайце Фонду сацыяльнай абароны насельніцтва. Гэта на 120,6 рубля менш, чым было ў лютым. Новы памер выплат будзе дзейнічаць да канца гэтага месяца.
Памер дапамогі на пахаванне прывязаны да сярэдняй зарплаты па краіне за пазамінулы месяц (гэта значыць двума месяцамі раней адносна месяца смерці). Так, у студзені гэтага года сярэдняя зарплата ўпала на 120,6 рубля – да 1118,1 рубля. Адпаведна, на такую суму ўпаў і памер дапамогі на пахаванне ў сакавіку.
У лютым дапамога на пахаванне складала 1 238,7 рубля, а ў студзені – 1 113,1 рубля.
На выплату дапамог на пахаванне расходуецца каля 3% ад усіх выдаткаў ФСАН на выплату ўсіх відаў дзяржаўных дапамог. Да прыкладу, у 2017 годзе гэты паказчык склаў 3,3%. Так, на выплату ўсіх відаў дзярждапамог было накіравана прыкладна 2,6 мільярда рублёў. Гэта значыць на дапамогі на пахаванне было выдзелена каля 86 мільёнаў рублёў.
Дапамогу на пахаванне прызначаюць, калі па яе звярнуліся не пазней за шэсць месяцаў з дня смерці. «А ў выпадку працяглага вышуку памерлага – не пазней за шэсць месяцаў з дня пахавання», – удакладняюць у ФСАН.
Памер якіх яшчэ выплат залежыць ад сярэдняй зарплаты
Да сярэдняй зарплаты прывязаныя таксама такія выплаты, як дапамогі на дзяцей да 3 гадоў, памер якіх цяпер пераглядаюць двойчы ў год – 1 лютага і 1 жніўня.
Рост гэтых выплат залежыць ад таго, як змянілася сярэдняя зарплата па краіне за папярэдні квартал. Калі сярэдні заробак падае або не змяняецца, то памер дапамогі застаецца на ранейшым узроўні, а калі расце, то следам падымаюць і дапамогі. Гэта значыць падзення памеру гэтых выплат, як у выпадку з дапамогай на пахаванне, не прадугледжана.