За суткі ў Беларусі зарэгістравана 1.816 выпадкаў COVID-19
За мінулыя суткі ў Беларусі зарэгістравана 1.816 выпадкаў COVID-19, памерлі 10 чалавек з каронавіруснай інфекцыяй, выпісана з бальніц 1.836 пацыентаў, паведамляе Міністэрства аховы здароўя.
За суткі колькасць афіцыйна выяўленых хворых знізілася — 28 снежня быў 1.841 выпадак каронавіруса і дзевяць смерцяў.
Агульная колькасць пацверджаных выпадкаў COVID-19 у краіне дасягнула 190.404, памерла 1.404 пацыенты з каронавірусам. Ачуняла 169.257 чалавек.
За мінулыя суткі выканана 4.555 тэстаў на каронавірус (усяго — 3.937.864).
29 снежня Міністэрства аховы здароўя абвясціла аб пачатку масавай вакцынацыі ў Беларусі ад каронавіруса COVID-19 расейскай вакцынай „Спадарожнік V”.
Міністр аховы здароўя Дзмітрый Піневіч адзначыў, што „імунізацыя застаецца найважнейшым кампанентам у барацьбе з эпідпрацэсам”. „Сёння ў нас пачнецца новы этап — масавая вакцынацыя супраць COVID-19. Першымі будуць вакцынаваныя медыцынскія работнікі, педагогі і тыя спецыялісты, якім з-за асаблівасцяў прафесіі даводзіцца шмат кантактаваць з людзьмі. Вакцынацыя будзе праводзіцца ў добраахвотным парадку”, — сказаў ён.
Чыноўнік дадаў, што ў краіне створаная сістэма захоўвання вакцыны, закупленае спецыяльнае медыцынскае маразільнае абсталяванне, якое дазваляе транспартаваць вакцыну.
Старт вытворчасці расійскай вакцыны „Спадарожнік V” на магутнасцях фармпрадпрыемства „Белмедпрэпараты” чакаецца ў пачатку вясны.
27 снежня намеснік міністра аховы здароўя — галоўны дзяржаўны санітарны ўрач Аляксандр Тарасенка ў эфіры праграмы „Контуры” тэлеканала ОНТ заявіў, што Беларусь выйшла на стабільны ўзровень захворвання на COVID-19, пасля навагодніх свят можа пачацца яго зніжэнне. „Пры другой хвалі колькасць захварэлых большая, чым пры першай. Вядома, рана пра гэта казаць, але я думаю, што мы ўжо выйшлі на стабільны ўзровень захворвання, і ў залежнасці ад таго, як пройдуць святочныя выхадныя дні — Новы год, Каляды, — можна будзе казаць ужо пра паступовае зніжэнне захворвання насельніцтва па ўсёй рэспубліцы”, — сказаў Тарасенка.