Улады Бразыліі адмовіліся разглядаць запыт аб паскоранай рэгістрацыі расейскай вакцыны «Спутник V»
Нацыянальнае агенцтва санітарнага нагляду Бразыліі (Anvisa) вярнула фармацэўтычнай кампаніі Uniao Quimica дакумэнты аб паскоранай рэгістрацыі ў краіне расейскай вакцыны «Спутник V», перадае «Медуза» са спасылкай на паведамленьне Anvisa.
У канцы сьнежня Uniao Quimica — партнэр расейскага Фонду прамых інвэстыцый (РФПІ) — запрасіла ў Anvisa дазвол на правядзеньне трэцяй фазы клінічных выпрабаваньняў вакцыны «Спутник V», а 15 студзеня падала запыт аб экстраным ўжываньні 10 мільёнаў доз вакцыны.
Апошні запыт быў вернуты кампаніі «у сувязі з неадпаведнасьцю мінімальным крытэрам, асабліва з прычыны адсутнасьці дазволу на правядзеньне трэцяй фазы клінічных выпрабаваньняў». Бразыльскі рэгулятар пакуль ня даў дазволу на выпрабаваньні, запытаўшы дадатковую інфармацыю.
СМІ расцанілі дзеяньні Anvisa як адмову ў паскоранай рэгістрацыі «Спутника V», але РФПІ заявіў, што агенцтва толькі запытала дадатковую інфармацыю адносна вакцыны, і яна будзе прадстаўленая ў найбліжэйшы час. «Запыт дадатковай інфармацыі рэгулятарам зьяўляецца стандартнай працэдурай і не азначае адмовы ў рэгістрацыі», — цытуе адказ РФПІ «Інтэрфакс».
«Спутник V» — першая расейская вакцына ад каранавірусу. У Расеі яе зарэгістравалі ў жніўні 2020 году. Таксама прымяненьне вакцыны дазволілі Беларусь, Аргентына, Балівія, Альжыр, Палестына, Вэнэсуэла і Парагвай.