У Менску пачнуць судзіць удзельнікаў „партызанскай групы” анархістаў
Крымінальную справу будзе разглядаць Менскі абласны суд.
15 лістапада ў Менску пачнуць судзіць удзельнікаў „партызанскай групы” анархістаў. Крымінальную справу будзе разглядаць Менскі абласны суд. Па ёй праходзяць Ігар Аліневіч, Дзмітрый Дубоўскі, Сяргей Раманаў і Дзмітрый Разановіч. Дату ў лістах на волю назвалі Дубоўскі і Раманаў. Яе пацвердзіў абаронца Аліневіча. Чакаецца, што суд будзе адкрыты (прынамсі, першае пасяджэнне).
Пра тое, што ў суд накіравана крымінальная справа групы анархістаў, Генпракуратура паведаміла месяц таму. Хлопцам інкрымінуюць здзяйсненне „актаў тэрарызму”, „незаконныя дзеянні ў адносінах агнястрэльнай зброі, боепрыпасаў і выбуховых рэчываў”. Іх затрымалі ў кастрычніку мінулага года каля ўкраінскай мяжы. Было заяўлена, што ўдзельнікі групы падпалілі аддзел ДАІ ў Мазыры і аўтамабілі каля будынка пракуратуры ў Салігорску.
У лютым 2021 года КДБ уключыў удзельнікаў групы Ігара Аліневіча ў „спіс арганізацый і фізічных асоб, якія маюць дачыненне да тэрарыстычнай дзейнасці”.