Доступ да сайту абмежавалі, дакладную прычыну не патлумачылі
Па словах каардынатара РЭПу Змітра Бародкі, адказ вельмі неканкрэтны і хутчэй нагадвае адпіску.
Міністэрства інфармацыі Беларусі адказала Прафсаюзу работнінкаў радыёэлектроннай прамысловасці пра прычыны, па якіх амежаваны доступ да сайту арганізацыі.
Па словах каардынатара РЭПу Змітра Бародкі, адказ вельмі неканкрэтны і хутчэй нагадвае адпіску.
– Мы накіравалі афіцыйны запыт у Міністэрства інфармацыі. І вось прыйшоў адказ, у якім паведамляецца, што доступ абмежавалі за распаўсюджванне інфармацыйных паведамленняў альбо матэрыялаў, распаўсюджванне якіх можа нанесці шкоду нацыянальным інтарэсам Рэспублікі Беларусь. І ў адказе сказана, што доступ да інтэрнэт-рэсурсу praca-by.info абмежаваны міністэрствам загадам яшчэ ад 21.08. 2020 году. Цікава, што загад быў у 20-ым годзе, а доступ фактычна быў абмежаваны недзе тры месяцы таму.
У адказе міністэрства інфармацыі таксама паведамляецца, што дадзенае рашэнне было прынятае на падставе паведамлення аператыўна-аналітычнага цэнтру пры прэзідэнце Рэспублікі Беларусь.
Па словах Змітра Бародкі, прафсаюз не выключае звароту ў суд, таму што ў адказе не гаворыцца, якія ж канкрэтна матэрыялы сайту маглі нанесці шкоду нацыянальным інтарэсам Беларусі. Атрымліваецца нейкае абстракнае абвінавачванне, не пацверджанае фактамі. З усяго гэтага можна зрабіць толькі адну выснову: ціск уладаў на грамадскія арганізацыі працягваецца.
Беларускае Радыё Рацыя