Валер Карбалевіч: Лукашэнка спрабуе адскочыць, і зараз стаўка, што Беларусь зноў міратворца
Валер Карбалевіч дзеліцца меркаваннем пра вайну з Украінай, і пра Лукашэнку, які раптам вырашыў стаць міратворцам
У эфіры нашага радыё палітычны аналітык Валер Карбалевіч дзеліцца меркаваннем пра вайну з Украінай, і распавядае, чаму Лукашэнка вырашыў стаць міратворцам, замест таго, каб быць у адным шэрагу з Пуціным, якога прызналі ваенным злачынцам.
– Я лічу, што Лукашэнка рэальна не зацікаўлены ва ўдзелу беларускіх войск у гэтай вайне. І тут шмат прычынаў, найперш, гэта вайна непапулярна ў беларускім грамадстве, прычым непапулярна не толькі сярод праціўнікаў Лукашэнкі, але і сярод прыхільнікаў. Я думаю, што і кіруючая эліта, кіруючая наменклатура ў пэўнай разгубленасці і дэмаралізаці ад гэтай сітуацыі. Як Лукашэнка пераконваў іх, нават на нарадзе з вышэйшым кіраўніцтвам краіны з указкай стаяў каля мапы і расказваў пра генеральную лінію палітыкі, такую палітінфармацыю чытаў для свайго атачэння. А потым, калі падпісваў дакументы аб рашэнні рэферэндума, ён казаў, што яму не вераць. І ўсё гэта ёсць вынік таго, што грамадства вельмі насцярожана ўспрыняла сам факт вайны, і факт таго, што з беларускай тэрыторыі адбываюцца напады на Украіну. Таксама такі чыннік – вайна зацягваецца, і калісці Лукашэнка даваў інтерв’ю Уладзіміру Салаўёву і казаў, што вайна скончыцца за 3-4 дні, а калі так хутка закончыцца, то ёсць шанец застацца ў шэрагу з пераможцамі, атрымаць нейкія дывідэнды ці лаўры гэтай перамогі, магчыма, эканамічныя, а тут аказваецца, што канца вайны і не бачна.
Пуціна ўжо аб’явілі ваенным злачынцам, а апынуцца ў гэтай ролі ў адным шэрагу з Пуціным зусім не хочацца, таму што гэта зусім іншы статус. Адна справа – дыктатар, якія парушае правы ўласных грамадзян, зусім другая справа – ўдзел у вайне супраць суседняй краіны. Зусім іншыя стаўкі. Таму Лукашэнка спрабуе неяк адскочыць, і зараз стаўка на тое, што цяпер Беларусь зноў міратворца. Улады на яе спрабуюць рабіць акцэнт, Лукашэнка распавядаў пра тое, як ён доўга арганізоўваў перамовы, размаўляў з Зяленскім, размаўляў з Пуціным, а потым міністр замежных спраў Макей прыехаў на Прыпяць і выступіў на камеры перад дэлегацыямі, дзе расказваў, што менавіта Беларусь тут галоўны міратворца. Гэта вельмі паказальна.
– Але ў той жа час ракеты працягваюць з беларускай тэрыторыі запускацца ў бок Украіны, заходзяць расейскія войскі, тут Лукашэнка паказвае, што не кантралюе сітуацыю, калі Расея выкарыстоўвае Беларусь, як плацдарм?
– Гледзячы па ўсім, так. І гэта таксама непрыемная сітуацыя для Лукашэнкі. Таму ён спрабуе круціцца: з аднаго боку кажа, што даведаўся з медыя, што дзьве ракеты пусцілі, а з іншага боку кажа, што сам папрасіў Пуціна, каб гэтыя войскі ўвялі, бо статус кіраўніка, які не кантралюе тэрыторыю вельмі хваравіты для Лукашэнкі, як аўтарытарнага лідара.
Цалкам размову слухайце ў далучаным аўдыёфайле:
Беларускае Радыё Рацыя