Агляд прэсы: уяўнае адзінства?
Ад міграцыйнага крызісу да агрэсіі ва Украіне: Беларусь па-ранейшаму ў балтыйскім парадку дня. Зацягнутыя вынікі Саміту НАТО. Старшынства ў ЕЗ: якой ацэнкі заслугоўвае Парыж? Польшча крытыкуе словы амбасадара Украіны.
Artykuł Агляд прэсы: уяўнае адзінства? pochodzi z serwisu БЕЛАРУСКАЕ РАДЫЁ РАЦЫЯ.
Ад міграцыйнага крызісу да агрэсіі ва Украіне: Беларусь па-ранейшаму ў балтыйскім парадку дня. Зацягнутыя вынікі Саміту НАТО. Старшынства ў ЕЗ: якой ацэнкі заслугоўвае Парыж? Польшча крытыкуе словы амбасадара Украіны. Падрабязнасці свежых матэрыялаў замежнай прэсы даведаемся ў аглядзе Вольгі Сямашкі.
«Другое ўварванне Расеі ва Украіну ўступае ў пяты месяц працягу, але іншая знамянальная дата нядаўна прайшла ў Беларусі. 23 траўня споўніўся год, як беларускія ўлады захапілі камерцыйны рэйс Ryanair, які перавозіў пасажыраў, у тым ліку беларускага апазіцыянера Рамана Пратасевіча, з Афін у Вільню. У той час як гэты інцыдэнт, магчыма, знік з памяці ў некаторых частках свету, сітуацыя ў Беларусі і на яе межах па-ранейшаму застаецца ў цэнтры ўвагі яе суседзяў па рэгіёне ў краінах Балтыі. Апынуўшыся ў пастцы паміж жаданнем дыверсіфікаваць партнёрства і сувяззю са сваім адзіным прыхільнікам, Расеяй, Беларусь вядзе таксічную палітыку, якая прынесла новыя выклікі бяспецы ў Балтыйскім рэгіёне», – паведамляе еўрапейскае выданне Еurasiareview.
«Міжнародная супольнасць са скепсісам сустрэла патрабаванне Расеі адмяніць санкцыі ў абмен на бяспечную транспарціроўку збожжа з украінскіх партоў, шукаюцца альтэрнатыўныя варыянты дастаўкі. Адзін з найбольш рэалістычных варыянтаў — чыгуначны маршрут з Украіны праз Беларусь у балтыйскія парты. Беларусь ахвотна пацвердзіла зацікаўленасць у такой здзелцы, але маральныя аспекты супрацоўніцтва з Беларуссю могуць быць асабліва няпростымі для Літвы, якая прымае ў сябе лідэра беларускай апазіцыі Святлану Ціханоўскую і стала домам для тысячаў уцекачоў з Беларусі. І пакуль сусветныя лідэры разважаюць пра заяўку Беларусі на транспарціроўку збожжа, варта ўзгадаць мінулыя спробы збліжэння з аўтарытарнай краінай. Усе яны ў выніку скончыліся новымі рэпрэсіямі ўнутры краіны і працяглым паваротам Беларусі на Ўсход у замежнай палітыцы. Беларусь па-ранейшаму заслугоўвае пільнай увагі; яе ўлады, хутчэй за ўсё, прычыняць больш галаўнога болю балтыйскаму рэгіёну», – працягвае адсочваць сітуацыю еўрапейскае выданне.
Прэса працягвае аналізаваць вынікі саміту НАТО, які завяршыўся 30 чэрвеня ў Мадрыдзе. У новай стратэгічнай канцэпцыі Расея разглядаецца ўжо не ў якасці партнёра, але як галоўная пагроза альянсу. У ходзе сустрэчы было прынята рашэнне аб пашырэнні альянсу на поўначы кантынента за кошт Швецыі і Фінляндыі, а таксама пра узмацненне ўсходняга флангу і выдзяленні мільярдных сум на абаронныя мэты.
„Сярод краін НАТО да гэтага часу няма кансэнсусу наконт таго, як быць з Расеяй”, – піша брытанская газета The Observer.
«Усе адзіныя ў адным: нельга дапусціць таго, каб цяперашняя расейская агрэсія скончылася поспехам. Аднак ці значыць гэта, што Расея павінна быць зрынута фізічна на палях Украіны, як пра гэта кажуць Вялікабрытанія і большасць краін Цэнтральнай і Ўсходняй Еўропы? Ці ж будзе дастаткова, калі вайна скончыцца такім чынам, што Маскве няма чаго будзе прад’явіць у якасці пераканаўчай перамогі, як таго палічыла б за лепшае палітычнае кіраўніцтва Германіі? Як толькі Масква намякне, што імкнецца да перамір’я ва Украіне, усе гэтыя рознагалоссі ўнутры НАТО праявяць сябе на поўную сілу», – папярэджвае брытанскае выданне.
У мінулы чацвер пасада старшыні Еўрапейскай рады перайшла ад Францыі да Чэшскай Рэспублікі. У часы французскага старшынства асноўная ўвага надавалася такім тэмам, як энергетычны пераход, рэгуляванне сферы лічбавых паслуг і абарона межаў. Парыж таксама прыкладаў намаганні да таго, каб ЕЗ выпрацаваў адзіную пазіцыю адносна расейскай агрэсіі ва Украіне. Еўрапейская прэса падводзіць вынікі французскага старшынства, і прыходзіць да неадназначных высноў.
Швейцарская газета Le Temps падкрэслівае галоўнае дасягненне старшынства Францыі.
«Гэта – захаванне і нават умацаванне еўрапейскага адзінства. Што не было само па сабе разуменнем на кантыненце, які разрываецца паміж Усходам і Захадам, Поўначчу і Поўднем, паміж «пацыфістамі» і «падпальшчыкамі вайны», прыхільнікамі Еўропы і еўраскептыкамі, ва ўмовах кліматычнага крызісу і крызісу пандэміі каранавіруса, і далей па спісе. Гэты поспех, вядома, не абумоўлены адным толькі старшынствам Францыі. Свой унёсак дадала супольнасць дзяржаў Еўразвязу, не менш важную ролю адыгралі і дзеянні Еўракамісіі і Еўрапарламента. Аднак няўжо без рашучасці Францыі і Нямеччыны, якая далучылася да яе, ЕЗ расчыніў бы свае дзверы перад Украінай?», – задае нязручнае пытанне швейцарскае выданне.
Словы амбасадара Украіны ў Берліне Андрэя Мельніка выклікалі буру абурэння: у адным з інтэрв’ю ён адхіліў дачыненне лідэра ўкраінскага нацыяналістычнага руху Сцяпана Бандэры да масавых забойстваў габрэяў і палякаў падчас Другой сусветнай вайны. Кіеўскае МЗС афіцыйна дыстанцыявалася ад выказванняў амбасадара, заявіўшы, што сказанае – гэта прыватная думка Мельніка. Абурэнне не ўляглося, і перш за ўсё, у Варшаве.
«Выказванні Мельніка не вытрымліваюць крытыкі з пункту гледжання гістарычных фактаў», – назірае сітуацыю збоку нямецкая газета taz.
«Бандэра ўнёс актыўны ўклад у тое, што ў саракавыя гады людзі: палякі і габрэі падвяргаліся пераследу, выгнанню і забойствам. Сведчанні гэтаму можна адшукаць у любой спецыялізаванай бібліятэцы. Зразумела, Мельнік мае рацыю, калі кажа пра тое, што Бандэра выкарыстоўваецца Расеяй як выява ворага ў барацьбе супраць «нацыстаў», якія нібыта кіруюць Украінай. Але гістарычныя экскурсы, якія могуць быць станоўча сустрэты «дома», наўрад ці дапамогуць у вайне, у якой Украіна можа выстаяць толькі пры падтрымцы звонку. Заявы Мельніка сведчаць пра тое, што непарушнае сяброўства Польшчы з Украінай і яе падтрымка ў гэтай агрэсіўнай вайне ў гістарычным плане знаходзіцца на вельмі тонкім лёдзе», – папярэджвае нямецкае выданне.
Агляд сусветнай прэсы падрыхтавала Вольга Сямашка.
Artykuł Агляд прэсы: уяўнае адзінства? pochodzi z serwisu БЕЛАРУСКАЕ РАДЫЁ РАЦЫЯ.