Вечная пушчанская песня?
Нездарма гавораць у народзе, што ваўка цягне ў лес.
Artykuł Вечная пушчанская песня? pochodzi z serwisu БЕЛАРУСКАЕ РАДЫЁ РАЦЫЯ.
Нездарма гавораць у народзе, што ваўка цягне ў лес. Побач маёй роднай вёскі лесу хоць ты адбаўляй. Яна папраўдзе зараз поўнасцю акружана толькі лесам, але цягам апошняга больш за паўгода патрапіць у яго стала і мне — больш пушчанскаму дзіку, чымсьці хіба ваўку — вельмі складанай справай. Добра, што прынамсі яшчэ мог заехаць я на родны панадворак, бо ўжо ў суседнія вёскі і глыбіню лесу не мог ужо легальна патрапіць. Усе ведаем, што галоўнай прычынай такіх парадкаў быў прыняты ў канцы 2021 года польскай дзяржавай закон пра надзвычайнае становішча ў памежнай польска-беларускай паласе. Абмяжоўваў ён права на ўезд турыстам і журналістам у гэтую паласу, даючы ваенізаваным фармаванням вяршэнства над грамадзянскімі правамі. Мэтай такіх рашэнняў было змаганне з кіраванай Лукашэнкам хваляй мігрантаў перш за ўсё з Блізкага Усходу у бок галоўным чынам Польшчы, Літвы і Латвіі. Цяпер з перспектывы пачатай 24 лютага гэтага года расейска-ўкраінскай вайны больш ясным і зразумелым стала, што эміграцыйны крызіс не абышоўся тут без інспірацыі і доўгіх рук, дацягнуўшыхся сюды ажно з‑за крамлёўскіх муроў. Насупраць такім памкненням і праз наш лес збудавалі таксама мур. Такім чынам у геапалітычна-гістарычным плане разбураны больш за трыццаць гадоў таму берлінскі мур, перасунуўся ўмоўна з Берліна ў Белавежу. Затым узбройваецца ён паспешлівым ходам па абодвух баках палітычна-мілітарных сістэм самай сучаснай вайсковай тэхнікай. А гэта на практыцы абазначае, не дай Божа такой сітуацыі, што для снарадаў і ракет мур гэта не перашкода. Нават яго бамбіць няма патрэбы — дастаткова некалькі гадзін і быў мур… няма муру. А затым быў лес і не будзе лесу. Жахліва і сумна. Але пакуль з 1 ліпеня ўжо можна ўсім мясцовым і прыезджым жадаючым паглядзець на мур з адлегласці двухсот метраў, бо падышоўшы бліжэй можна быць яшчэ і аштрафаваным. Але хаця адкрылі нам права ўступу ў лес. А тут вось і пачаўся грыбна-ягадны сезон. Хто жывы, той у лес — бо ж гэта наш генетычны след.
А ён не абы-які, бо ж завецца няйначай як… Белавежская пушча. Праўда — годна, дастойна і распазнавальна ва ўсім свеце, нават і для абарыгенаў на іншых кантынентах. Пры тым жа тыя міжкантынентальныя абарыгены пэўна ніколі нават і не задумваліся, як менавіта завуцца пушчанскія абарыгены, якія спрадвечна засяляюць яе тэрыторыю, не гаварыўшы ўжо пра тое, на якой дзіўнай і незразумелай мове мы ж размаўляем паміж сабою. Ужо нават часта і густа «непанятнай» і «незрозумялэй» для саміх сябе. Бо чалавецтва гэта нейкая нечалавечая цывілізацыя і ў мінулым, і зараз, якое ахоўвае пушчы, стварае чырвоныя кнігі гінуўшых птушак, звяроў, раслінак, а нават спрабуе іх вяртаць да жыцця і разводзіць шляхам генетычных уваскрашэнняў, і надалей баіцца і моліцца да магутных прыродных сіл і ўяўных багоў з гэтага свету. Усё гэта ў мінулым і зараз — так як трэба — па Божаму, як кажуць у простанароддзі. І нават старадаўні дуб з ускраіны Белавежскай пушчы, што красуецца пры вёсцы Прыбудкі Нарваўскай гміны, выбралі еўрапейскім дрэвам 2022 года. А названы ён святой памяці Янушам Корбелем, белавежскім натуралістам і краязнаўцам, проста Дунін, у гонар класіка беларускай літаратуры Вінцэнта Дуніна-Марцінкевіча. Праўда, што для нашага вуха і душы гучыць прыемна, казыча прытым расстроеныя нацыянальныя струны. Я не спецыяліст па Дуніну-Марцінкевічу і не ведаю, ці ягоныя ногі і вочы завандравалі калі-небудзь у наша старонне. Але як аўтару «Пінскай шляхты» рассяленне беларускага этнасу і яго гаворак мабыць не было чужое. Таксама і на Падляшшы, асабліва ў яго музычна-спеўным плане. Але мне зараз у гэтым месцы не да песні пра дуб ці неад’емную для гэтых мясцін «Песню пра зубра» Міколы Гусоўскага. Нас усіх турбуе і трывожыць адно: не дай Божа вайны. Бо дарэмна будзе потым тут шукаць чалавечых, звярыных ці лясных слядоў.
Яўген Вапа
Artykuł Вечная пушчанская песня? pochodzi z serwisu БЕЛАРУСКАЕ РАДЫЁ РАЦЫЯ.